पहिलो लेगमा चेल्सी र रियल म्याड्रिडको बराबरी

काठमाडौँ : युइएफए च्याम्पियन्स लिग फुटबलको पहिलो सेमिफाइनलको पहिलो लेगमा चेल्सी र रियल म्याड्रिडले बराबरी खेलेका छन् । मंगलबार राती रियलको घरेलु मैदानमा भएको खेलमा चेल्सी र स्पेनिस महारथी रियलले एक–एक गोलको बराबरी खेलेका हुन् । 

चेल्सीका लागि क्रिष्टियन पुलिसिकले खेल सुरु भएको १४ औँ मिनेटमा गोल गर्दै टिमलाई अग्रता दिलाएका थिए । तर त्यो अग्रता भने धेरैबेर टिकेन ।

खेलको २९ औँ मिनेटमा रियलका लागि करिम बेन्जेमाले बराबरी गोल फर्काए । अब चेल्सीको मैदानमा हुने दोस्रो लेगमा विजयी गोल गर्ने टिम फाइनल पुग्नेछ । च्याम्पियन्स लिगको दोस्रो सेमीफाइनलमा आज राती म्यान्चेस्टर सिटी र पीएसजी खेल्नेछन् ।

पीएसजी गएको सिजनको उपविजेता हो । उसले यसपटक बार्सिलोना र आफूलाई फाइनलमा हराएको बायर्न म्युनिकलाई हराउँदै सेमीफाइनल पुगेको हो ।