नेकपा सचिवालय बैठक बालुवाटारमा सुरु

काठमाडौं : सत्तारुढ दल नेकपाको बहुप्रतिक्षित सचिवालयको बैठक प्रधानमन्त्रीको सरकारी निवास बालुवाटारमा सुरु भएको छ । सचिवालय बैठकका लागि सबै नेताहरू बालुवाटार पुग्‍नु अगावै प्रधानमन्त्री केपी शर्मा ओलीले अर्का अध्यक्ष पुष्पकमल दाहाललाई लामो पत्र पठाएर आफ्नो जिममेवारीमा परेको काम पूरा गर्न आग्रह गरेका छन् । यद्यपी उनले दाहाललाई आफूले फकाएको र सँगै अघि बढ्ने जानकारी दिएको उल्लेख गर्दै रमाईलो पत्र लेखेको सचिवालयका एक सदस्यले बताए ।

बहुमत सचिवालय सदस्यहरूको निरन्तर दबाबपछि प्रधानमन्त्री ओली बैठक बोलाउन सहमत भएकपछि महासचिव विष्णु पौडेलले बैठक बोलाएका हुन् । आजको बैठकमा सरकारका काम कारबाही, मन्त्रिपरिषद्‍  पुर्नगठन, पार्टीको विवाद समाधान, राजदूत नियुक्तीको सिफारिस र स्थायी समिति बैठकका निर्णय कार्यान्वयनलगायत विषयमा छलफल हुने नेताहरूले बताउँछन् ।

सचिवालय सदस्यहरूले केन्द्रीय कमिटी बैठक अगावै स्थायी कमिटीको बैठक बोलाउन पनि माग गर्ने तयारी छ । नेकपा प्रवक्ता नारायणकाजी श्रेष्ठले बैठकका लागि बैठक होइन यसमा सबै पक्षले आआफ्नो क्षेत्रमा गरेका कामको समिक्षा, दलभित्र र सरकारमा भएको काम पनि नियाल्ने विषायमा छलफल हुने जानकारी दिए । बैठकमा अध्यक्ष पुष्पकमल दाहाल वरिष्ठ नेताद्वय माधवकुमार नेपाल र झलनाथ खनाल, उपाध्यक्ष वामदेव गौतम, महासचिव विष्णु पौडेल, ईश्वर पोखरेल, प्रवक्ता श्रेष्ठ र गृहमन्त्री रामबहादुर थापा सहभागि छन् ।

बैठकको आरम्भमा नै दाहाललाई लेखेको पत्रको प्रशंग उठेको थियो । प्रधानमन्त्री ओलीले दाहाललाई लामो पत्र किन र केका लागि लेखे भन्‍ने विषयले अर्को बहस श्रृजना भएको छ । दाहाल फकाउने भन्दा पनि विषय र प्रशंगलाई मोड्ने बालुवाटार रणनीतिको रूपमा पनि यो पत्रलाई लिइएको सचिवालय सदस्यले बताए ।