एजेण्डामै प्रवेश नगरी सकियो नेकपा सचिवालय बैठक

काठमाडौं :सत्तारुढ नेकपाको बहुप्रतिक्षित भनिएको सचिवालय बैठक ठोस कुराकानीमा प्रवेश नै नगरी सकिएको छ । अर्को बैठक तिहार सकिए लगत्तै बस्‍ने सहमति नेताहरूबीच भएको छ । आधाघण्टा ढिला गरि शुरु भएको बैठक पौने घण्टा बसेर सकिएको थियो ।

‘नेकपाका बहुमत सचिवालय सदस्यका पत्र, नेकपा अध्यक्ष एवं प्रधानमन्त्री केपी शर्मा ओलीले बहुमत सचिवालय सदस्यलाई सोही पत्र प्रतिक्रियास्वरुप दिएको पत्र र दुवै पत्रलाई समेटेर अध्यक्ष पुष्पकमल दाहालले तयार पारेको प्रतिवेदन पेस गर्दै बैठक सकिएको छ,’ प्रवक्ता नारायणकाजी श्रेष्ठले बैठक इकागजलाई जानकारी दिए ।  

सबै पत्रको बारेमा सचिवालय सदस्यहरूले विस्तृतमा अध्ययन गरेर अर्को बैठक मंसिर तीन गते बस्‍ने तय भएको श्रेष्ठले बताए । प्रधानमन्त्री निवास बालुवाटारमा बैठक बसेको थियो । बैठक बस्‍नु अघि अध्यक्ष ओलीले उपाध्यक्ष वामदेव गौतमसँग छुट्टै छलफल गरेका थिए । बहुमत सचिवालय सदस्यले केन्द्रीय कमिटीको बैठकअघि स्थायी कमिटीको बैठक बोलाउनुपर्ने माग गर्ने तयारी यसअघि नै गरिसकेकाले यस्तै अध्ययनमा अलमल गराएर बैठक सार्ने दाउँ गरेको आरोप सचिवालय सदस्यहरुको छ ।

नेकपा वरिष्ठ नेता  एवं पूर्वप्रधानमन्त्री माधवकुमार नेपालले पार्टीको निर्णयलाई सबैले स्वीकार गर्ने प्रतिवध्दता भए पार्टीभित्र देखिएको समस्या समाधान हुने बताएका छन्  । नेपालले पार्टीको निर्णयलाई सबैले स्वीकार गरे समस्याको समाधान आफैँ हुने बताए । बहसबाट भाग्‍ने, बैठकबाट भाग्‍ने र कमिटी प्रणालीबाट भाग्‍ने भएमा समस्याको समाधान नहुने उनको धारणा थियो । शुक्रबारको बैठकलाई पनि यही संज्ञा दिइएको छ । प्रधानमन्त्रीले अध्ययनगर्ने भन्दै बैठकलाई पछि धकेलेका हुन् । यस विषयमा पनि पार्टीमा छलफल हुने भनिएको छ ।