कतारले मुख्य प्रशिक्षक सान्चेजको सम्झौता नविकरण नगर्ने

काठमाडौँ- कतारको राष्ट्रिय फुटबल टिमका मुख्य प्रशिक्षक फेलिक्स सान्चेजको सम्झौता नविकरण नहुने भएको छ । कतार फुटबल एसोसियसनले सान्चेजको सम्झौता डिसेम्बर ३१ मा टुंगिने र सम्झौता नविकरण नहुने जनाएको आईएएनएसले उल्लेख गरेको छ ।

कतारमा सम्पन्न फिफा विश्वकप फुटबल अन्तर्गत कतार समूह चरणबाटै बाहिरिएको केही समयपछि एसोसियसनको यस्तो निर्णय सार्वजनिक भएको हो ।

४७ वर्षीय स्पेनिस प्रशिक्षक सान्चेजको प्रशिक्षणमा कतारले विश्वकपमा इक्वेडर र नेदरल्यान्ड्ससँग समान २-० तथा सेनेगलसँग ३-१ गोलअन्तरले पराजित भएको थियो ।

विश्वकपअघि कतारले युरोपमा ६ महिना अभ्यास गर्नूका साथै सन् २०१९ को कोपा अमेरिका तथा गत वर्षको कोनकाकाफे गोल्डकपमा समेत सहभागिता जनाएको थियो । सान्चेज ५ वर्ष कतारको मुख्य प्रशिक्षकको रुपमा रहेका थिए ।