नेकपाको केन्द्रीय समिति बैठक टार्ने रणनीतिमा ओली

काठमाडौं : सत्तारूढ नेकपाका अध्यक्ष एवं प्रधानमन्त्री केपी शर्मा ओली स्थायी समिति र केन्द्रीय समितिको बैठक टार्ने रणनीतिमा अग्रसर बनेका छन् ।  उनले बहुमत सचिवालय सदस्यको निर्णयलाई पत्रमार्फत धावा बोलेका छन् । उनले लिखित जवाफ फर्काउँदै अध्यक्ष पुप्पकमल दाहाललाई फकाउने रणनीति तय गरेपछि शुक्रबारको सचिवालय बैठक निकै छोटो समय बसेर एजेण्डामै प्रवेश नगरी टुंगियो । यसलाई सत्तारुढ नेकपाभित्रको पत्र-दोहोरीको नामाकरण गरिएको छ ।

पार्टीका अर्का अध्यक्ष पुष्पकमल दाहालसहित बहुमत सचिवालय सदस्यहरू बरिष्ठ नेताद्वय माधवकुमार नेपाल र झलनाथ खनाल, उपाध्यक्ष वामदेव गौतम र प्रवक्ता नारायणकाजी श्रेष्ठले सचिवालय बैठक र त्यसपछि स्थायी समिति बैठक डाक्न कात्तिक २२ मा मौखिक होइन लिखित आग्रह  गरेका थिए । तर, ओलीले बैठक डाकेनन् । उल्टै पाँच पन्‍नाको जवाफ फर्काए । त्यसको जवाफ समेट्दै अर्का अध्यक्ष दाहालले प्रधानमन्त्री ओलीलाई पुनः अर्को पत्र लेखे ।

खासगरि पत्रमा पार्टीको संकट समाधानकै विषय उल्लेख भएको सचिवालय सदस्यहरुले बताएका छन् । ‘पार्टीमा उत्पन्‍न समस्यालाई कार्यसूची नै तय गरेर लगातार छलफल गर्ने निर्णय भएको छ,’ प्रवक्ता श्रेष्ठले बैठकपछि पत्रकारहरुसँग भने, ‘बैठकको आवश्यकता महसुस गर्दै कार्यकारी अध्यक्षसहित हामी सचिवालयका पाँच नेताले अध्यक्ष ओलीलाई सहमतिमा बैठकको लागि गर्दै पत्र, त्यसको जवाफमा अध्यक्ष ओलीले दाहाललाई अर्को पत्र र उक्त पत्रको जवाफमा अध्यक्ष दाहालले अर्का अध्यक्षलाई लेख्नुभयो । त्यही विषयमा छलफल हुँदै अध्ययन गर्ने र आगामी तीनमा बैठक बस्‍ने सहमति भएको छ ।’

त्यससँगै पार्टीमा देखिएको संकट निवारणका लागि तयार पारिएको प्रस्ताव र यसअघि जारी गरिएको अन्तरपार्टी निर्देशन अध्ययनका लागि सबै सदस्यलाई दिइएको छ । सबै सामाग्री अध्ययन गर्ने र भदौ अन्तिममा सम्पन्‍न स्थायी समितिको बैठकले दिएको योजनाको बारेमा समेत अध्ययन गरेर आउन भनिएको छ । ‘पुरानो निर्णय सहितको यस्ता सामग्रीको अध्ययनपछि पार्टीमा गम्भीर र समग्रतामा छलफल गरी पार्टी एकताको रक्षा गर्दै पार्टीलाई अझ सुदृढ बनाउने निष्कर्ष निकालिएको छ,’ प्रवक्ता श्रेष्ठले भने । भदौ २६ मा पार्टी स्थायी समिति बैठकपछि जारी गरिएको अन्तरपार्टी निर्देशिका सचिवालयका सबै सदस्यलाई विरतरण गरेका हुन् ।

अध्यक्ष ओलीले त्यो निर्णय बाड्नुको कारण थियो यसअघि भएका सहमतिमा सरकारमा बस्‍ने मात्र होइन बाहिर बस्‍नेहरू पनि उत्तिकै जिम्मेवार छन् भन्‍ने हो । बाहिर बस्‍नेलाई पनि कामको जिम्मेवारी दिएको तर समयमा सम्पन्‍न नगरेको भन्‍ने निश्कर्ष ओली पक्षको छ । करिव ४५ मिनेट चलेको बैठकमा प्रधानमन्त्री ओलीसहित त आधा घण्टा पनि बैठक भएन । अन्य सचिवालय पदाधिकारीहरू छलफल गरेर बस्दै थिए भने प्रधानमन्त्री अलिक पछि आएर बैठक आरम्भ गर्दै आफ्ना धारणा राखेका थिए ।

ओलीले सचिवालयमा प्रस्तुत दस्तावेज र उठेका विषय सचिवालयमै छलफल गर्नुपर्ने र तल स्थायी समितिमा लैजानु आवश्यक नभएको बताएका थिए । ‘सचिवालयमा पेस भएका कुराहरू स्थायी समितिमा एकैपटक किन लैजाने, यहीँ छलफल गरौं र टुंगोमा पुगौं,’  ओलीको भनाइ उद्धृत गर्दै एक सदस्यले भने, ‘जे विषयलाई पनि मासमा लगेर होइन पहिला माथि नै समाधान गर्नुपर्छ । आफू अनुकुल भए ठिक नत्र बेठिक भन्‍नेतर्फ नजाऔं ।’

मन्त्रिपरिषद हेरफेर, कर्णाली प्रदेशको अन्तरविरोध, ‘रअ’ का प्रमुखसँगको भेट, राजदूत नियुक्ति, पार्टीको स्थायी समितिको निर्णय कार्यान्वयन र संवैधानिक निकायका रिक्त पदमा नियुक्ति आदिबारे अन्तरविरोध रहेको पनि उल्लेख छ । प्रधानमन्त्री ओलीले बैठक नै नबोलाएको कारण पार्टीमा तत्काल विभाजन आउन सक्ने खतरा देखेपछि उनले बैठक बोलाएका थिए । नेकपाको सचिवालय बैठक यसअघि गत असोज २१ गते बसेको थियो । छोटै भएपनि बैठकमार्फत छलफल र संवाद शुरु भएकाले तत्कालको खतरा टरेको छ । 

आन्तरिक सहमतिका साथ गत भदौ २६ गते सम्पन्‍न स्थायी समिति बैठकको कार्यादेश बमोजीम सरकार र पार्टीका कामलाई प्रभावकारी रूपमा सञ्चालन गर्ने भनिए पनि त्यसमा अध्यक्ष एवं प्रधानमन्त्रीले लत्तो छाडेको भन्दै विवाद चुलिएको थियो । अघिल्लो सचिवालय बैठकमा सघीय मन्त्रिपरिषद्का मन्त्रीहरूको हेरफेरका नीतिगत आधारबारे छलफल भएको थियो । सोही बैठकले एकताका बाँकी कामलाई पूर्णता दिन अध्यक्षद्वय ओली र दाहालले १० दिनभित्र गृहकार्य गरी सचिवालयमा पेश गर्ने निर्णय गरे पनि त्यसको कार्यान्वयन हुन सकेको छैन ।

गत स्थायी समितिको बैठकमा अध्यक्षद्वयबीचको सहमतिका आधारमा गठित समस्या समाधान समितिको प्रतिवेदन परिमार्जनसहित प्रस्तुत र पारित भएपछि विवाद टंगिएको थियो । अघिल्लो स्थायी समितिको बैठकले अध्यक्ष एवं प्रधानमन्त्री ओली सरकारका काममा केन्द्रित हुने र अध्यक्ष दाहाल पार्टी काममा केन्द्रित भई कार्यकारी अध्यक्षको भूमिकामा रहने कार्यविभाजनको प्रस्ताव पारित गरेको थियो । नेकपाले आगामी चैत २५-३० सम्म महाधिवेशन हुने तथा सोको तयारीका लागि आगामी कात्र्तिक १५-१७ सम्म केन्द्रीय समितिको बैठक तय गरेकामा आगामी मंसिर १५ गतेका लागि केन्द्रीय समितिको बैठक सारिएको छ ।