वीरगञ्‍जमा बिहीबार राति थप १७५ जनामा कोभिड पुष्टि, पर्साका मात्रै १३१

वीरगञ्‍ज : वीरगञ्‍जमा थप १ सय ७५ जनामा कोभिड-१९ संक्रमण पुष्टि भएको छ । नारायणी अस्पतालको प्रयोगशालामा बिहीबार राति २ सय ८८ जनाको परिक्षण गर्दा ती मध्ये १ सय ७५ जनामा संक्रमण भेटिएको हो । परिक्षण गरिएको मध्ये ७० प्रतिशत भन्दा बढिमा संक्रमण भेटिएको अस्पतालका कोभिड कोर्डिनेटर डाक्टर सरोज रोशन दासले जानकारी दिए ।

कोभिडको दोस्रो लहर शुरु भएपछि वीरगञ्‍जमा एकै दिन नयाँ संक्रमित फेला परेको यो नै सबैभन्दा बढी हो । बिहीबार संक्रमण पुष्टि भएका १ सय ७५ मध्ये पर्सा जिल्लाका मात्र १३१ जना रहेका छन् । परिक्षण गरिएका मध्ये एक सय ३१ पुरुष र ४४ जना महिलामा कोभिड संक्रमण भएको नारायणी अस्पतालका कोभिड संयोजक डा.सरोज रोशन दासले बताए ।