अमेरिकाले भारतलाई दियो खोप उत्पादनमा प्रयोग हुने कच्चा पदार्थ

काठमाडौँ : कोभिड-१९ महामारीबाट पछिल्लो समय सर्वाधिक पीडित भारतलाई सहयोग गर्ने मुलुकहरु बढिरहेका छन् । त्यसमा अमेरिका पनि थपिएको छ । अमेरिकाले पठाएको कोभिड-१९ खोप उत्पादनमा प्रयोग कच्चा पदार्थ र अक्सिजन प्लान्ट भारतले शुक्रबार प्राप्त गर्‍यो । 

अमेरिकी सेनाको दुई विमान शुक्रबार बिहान भारतीय राजधानी नयाँ दिल्ली आइपुग्‍यो । जसले खोप उत्पादनमा प्रयोग हुने ३६ मिलिपोर फिल्टर र १७ अक्सिजन जेनेरेटर प्लान्ट ल्याएका छन् । अमेरिकाले पठाएको मिलिपोर फिल्टरको प्रयोग गर्दै पाँच लाख डोज खोप उत्पादन गर्न सकिने भारतीय अखबार दि ट्रिब्युनमा उल्लेख गरिएको छ । भारतका लागि अमेरिकी सहयोगको तेस्रो खेप बोकेर अमेरिकी सेनाको विमान मे ३ मा नयाँ दिल्ली पुग्‍ने बताइएको छ ।

अमेरिका मात्रै होइन, खाडी क्षेत्रका मुलुकले पनि भारतलाई सहयोग गरिरहेका छन् । संयुक्त अरब इमिरेट्स (युएई) बाट १ सय ४० मेट्रिकटन अक्सिजन शुक्रबार नै भारत पुग्‍ने तालिका रहेको छ । त्यस्तै बहराइनले पनि भारतीय नेभीको पानी जहाजमार्फत ४० मेट्रिकटन अक्सिजन पठाएको छ । उता कुवेतले पनि भारतलाई १ सय ८५ मेट्रिकटन अक्सिजन सहयोग गर्ने जनाउ दिसकेको छ ।