ओलीले दिए कांग्रेस सभापति देउवालाई धन्यवाद

काठमाडौँ– नेकपा एमालेका अध्यक्ष केपी शर्मा ओलीले कांग्रेस सभापति शेरबहादुर देउवालाई सरकारलाई समर्थन गरेकोमा धन्यवाद दिएका छन् ।

उनले मंगलबार नयाँ प्रतिनिधिसभाको दोस्रो बैठकमा प्रधानमन्त्री पुष्पकमल दाहाल‘प्रचण्ड’ले मागेको विश्वासको मतको छलफलमा देउवालाई धन्यवाद दिएका हुन् । ‘देउवाजी, प्रतिपक्षका नेताज्यूलाई पनि धन्यवाद भन्न चाहान्छु,’ उनले भने, ‘उहाँले सरकारको समर्थन गर्नुभएको छ । राप्रपाले समर्थन गरेको सरकारमा सामेल भएको छैन । त्यही हैसियत कांग्रेसले राखेको छ ।’

उनले देउवाले लोकतन्त्रको एउटा नयाँ भाष्य निर्माण गरेको समेत बताए । अध्यक्ष ओलीले देउवालाई विगतमा संसद् विघटन गर्दा आफूले समर्थन गरेकोसमेत बताए ।  
‘एउटा कुरा भन्छु, २०१५ सालमा संसद् बन्यो २०१७ सालमा विघटन गर्ने म हाेइन राजा हुन्,’ उनले भने, ‘२०५१ सालमा विघटन गरेर मध्यावधिमा जाने म होइन कांग्रेस हो । शेरबहादुरजीले २०५८ साल असारमा मध्यावधिमा गएर माघ १९ पुग्या होइन । मैले त्यतिबेला समर्थन गरेको थिएँ । अरुले विरोध गर्दा पनि ।’