स्वीजरल्याण्डले नेपाललाई १.२६ अर्ब सहयोग दिने

काठमाडौं । स्वीजरल्याण्ड सरकारले नेपाललाई मोटोरल लोकलः सडक पुल कार्यक्रमका लागि एक अर्ब २६ करोड रुपैँया बराबरको प्राविधिक सहयोग दिने भएको छ । उक्त सहयोग परिचालनका लागि आज सम्झौता भएको हो । सम्झौतामा अर्थ मन्त्रालयका सहसचिव श्रीकृष्ण नेपाल र स्वीट्जरल्याण्ड सरकारका तर्फबाट नेपालका लागि राजदूत एलिजावेथ भान क्यापेलरले हस्ताक्षर गरेका छन् ।
सम्झौतामा हस्ताक्षर अघि राजदूत क्यापेलरले अर्थमन्त्री विष्णुप्रसाद पौडेलसँग भेट गरेकी थिइन् । उक्त भेटमा मन्त्री पौडेलले कोभिड–१९ ले सिर्जना गरेको चुनौती सामना गर्न विश्वव्यापी सहकार्य र एकताको आवश्यकता औंल्याउँदै दोस्रो लहरको प्रभाव रोक्न युरोपेली मुलुकहरुले चालेको कदमको प्रशंशा गरेका थिए । राजदूत क्यापेलरले नेपालमा पछिल्लो दशकमा महत्वपूर्ण परिवर्तनहरु संस्थागत भएको भन्दै नेपालको आर्थिक सामाजिक विकासका लागि स्वीस सरकारको साथ र सहयोग रहने बताइन् । उनले संघीयता कार्यान्वयनका लागि नेपालले प्राप्त गरेको सफलताको प्रशंशा गर्दै संघ, प्रदेश र स्थानीय तहसम्म विकास सहायता परिचालन गर्ने कार्यविधिहरुको निर्माण गरी स्पष्टता ल्याएको बारे चर्चा गरेकी थिइन् ।