विद्युत चोरी उद्योग सञ्‍चालन, सोधखोजमा गएका कर्मचारीमाथि उल्टै कुटपिट

बुटवल : कपिलवस्तुको एक ईटा उधोगका सञ्‍चालकले विद्युत्  हुकिङ गरी (चोरी) मोटर चलाएको देखेपछि सोधपुछ गरिरहेका कर्मचारीलाई उल्टै कुटपिट गरेका छन् । कपिलवस्तुको शिवराज नगरपालिका-८ पटपरमा चुहावट नियन्त्रणका लागि गएका विद्युत प्राधिकरण कृष्णनगर वितरण केन्द्रका कर्मचारीमाथि शुक्रबार कुटपिट भएको हो ।

पटपरमा रहेको मनकामना  इटा उद्योगका सञ्‍चालकले कर्मचारीलाई कुटपिट गरेका हुन । मनकामना इटा उद्योगले  २ लाख १९ हजार भन्दा बढी विद्युत महसुल  भुक्तान गर्न बाँकी रहेकोले लाइन काटिएको थोयो । इट्टा उद्योगले लाइन काटिएपछि  चोरेर विद्युत प्रयोग गर्दै आएको आवस्थामा विद्युत कर्मचारी पुगेपछि कुटपिट भएको हो ।

इटा उद्योगले विद्युत चोरी गरी मोटर चलाउदै आएको विद्युत कर्मचारीहरूले देखेपछि उक्त मोटर ल्याउन लाग्दा इटा सन्चालकले कर्मचारीलाई कुटपिट गरेका हुन । इटा मालिक सुशील कुमार शुक्ला, आनन्द कुमार शुक्ला र उनका भाई, भतिजहरूले कर्मचारीहरूलाई कुटपिट गरेको विद्युत प्राधिकरणले जनाएको छ । विद्युत कर्मचारीहरू कोशलराज चौधरी, भुपेन्द्र चौधरी, उमेश कुमार शाह, सरोज थारु र मथुरा प्रसाद चौधरीलाई कुटपिट गरिएको विद्युत  प्राधिकरण कृष्णनगर वितरण केन्द्रका प्रमुख कमर आलम खानले जानकारी दिए । 

विद्युत कार्यलयका कर्मचारीहरूलाई चोरी कार्यमै सम्लग्न उधोगका संचालकले कुटपिट गरेपछि कर्मचारीहरू कारबाहीको माग गर्दै आन्दोलनमा उत्रिएका छन् । नेपाल विद्युत प्राधिकरण कृष्णनगर वितरण केन्द्रका कर्मचारीलाई कुटपिट गर्नेलाई कारबाही गर्नुपर्ने माग उनीहरूको छ।  

विद्युत कर्मचारीमाथि हातपात गर्ने  शुक्लालाई कारबाही गर्न माग गरिएको खानले बताए । इटा उद्योग सन्चालकको कुटपिटबाट सरोज थारु र मथुरा प्रसाद चौधरीको कान र मुखमा चोट लागेको छ ।  जिल्ला प्रशासन कार्यालय कपिलवस्तु, नेपाल विद्युत प्राधिकरण प्रादेशिक वितरण कार्यालय बुटवल र वडा प्रहरी कार्यालय चन्द्रौटालाई पत्र लेख्दै कुटपिट गर्नेलाई कारबाहीको माग गरेको कृष्णनगर वितरण केन्द्रका  प्रमुख कमर आलम खानले जानकारी दिए । 

 कुटपिट गर्ने मध्ये दुई जना पक्राउ परेको वडा प्रहरी कार्यालय चन्द्रौटाले जनाएको छ । पक्राउ पर्नेहरूमा शिवराज नगरपालिका ८ पटपरका सुशील कुमार शुक्ला र आनन्द कुमार शुक्ला रहेका छन् । उनीहरूमाथि अनुसन्धान भैरहेको प्रहरीले जनाएको छ ।