म‌ंसिर २ गतेबाट टुँडिखेलमा खाना खुवाउन बन्द

तस्बिर : हन्ड्रेड्स ग्रुपको फेसबुक पेजबाट

काठमाडौं : आगामी मङ्सिर दुई गतेबाट टुँडिखेलमा खाना खुवाउने कार्य बन्द हुने भएको छ । स्वास्थ्य क्षेत्रको जोखिम, सङ्क्रमणको सम्भावना र मानवअधिकारको संरक्षण गर्ने उद्देश्यले त्यस्तो सेवा सडक क्षेत्रबाट कुनै बन्द संरचना भित्र स्वास्थ्य मापदण्डको पालना गरी सञ्‍चालन गरिने जनाइएको छ ।

काठमाडौँ महानगरपालिका र भोजन सेवा सञ्‍चालन गर्ने संस्थाबीच भएको छलफलले आगामी दुई गतेबाट भने बन्द संरचनाभित्र व्यवस्थित रुपमा सेवा सञ्‍चालन हुने निर्णय गरेको हो । असहाय, अशक्त र शारीरिक रुपमा काम गर्न नसक्नेलाई मानवसेवा आश्रममा खान, बस्‍न तथा स्वास्थ्य उपचारको प्रबन्ध गरिएको र आवश्यक समन्वयका लागि नजिककका वडा कार्यालय वा सिधै आश्रममा सम्पर्क गर्न काठमाडौँ महानगरपालिकाले अनुरोध गरेको छ ।

महानगरपालिकाले कोभिड-१९ का कारण रोजगारी गुमाएका श्रम गर्न सक्नेलाई जीवन निर्वाहका लागि पारिश्रमिक कार्यविधि २०७७ बमोजिम  रोजगारी समेत उपलब्ध गराउने भएको छ ।