प्रदेश नं १ मा थपिए २३१ कोभिड-१९ संक्रमित

विराटनगर : प्रदेश नं १ मा पछिल्लो २४ घण्टामा  २३१ जना कोरोना सङ्क्रमित थपिएका छन् । ६ सय २५ जना सङ्क्रमित निको भई घर फर्केका छन् । उनीहरु विभिन्न अस्पताल र होम आइसोलेसनबाट निको भएको प्रदेशको सामाजिक विकास मन्त्रालयले जनाएको छ । प्रदेशमा अहिलेसम्म निको हुनेको सङ्ख्या १७ हजार ७ सय ७८ पुगेको छ ।

२४ घण्टामा ७ सय २५ जनाको पीसीआर परीक्षण गर्दा १०५ महिला र १२६ पुरुषको रिपोर्ट पोजेटिभ आएको मन्त्रालयले जनाएको छ ।  

सङ्क्रमित भएकामा झापामा १०३, मोरङमा ८६ मध्ये विराटनगरमा ६३, सुनसरीमा ३३, इलाममा तीन, तेह्रथुममा दुई, उदयपुरमा एक र प्रदेश बाहिरका तीन जना रहेका छन् । प्रदेशमा अहिलेसम्म सङ्क्रमितको सङ्ख्या २३ हजार ६६५ पुगेको छ । प्रदेशमा हालसम्म एक लाख ७८ हजार ७९ जनाको परीक्षण गरिएको छ ।