ज्यानमारा पैसा

भदौ, २६ गते दिउँसो कीर्तिपुर नगरपालिका वडा-७ मा एउटा घटना घट्यो । ४२ वर्षीय शम्भु महतो आफ्नै घरबेटी प्रेमकृष्ण महर्जनबाट मारिए । महर्जनले ढोकामा लगाउने काठको आग्लोले प्रहार गर्दा महतो घाइते भएका थिए  । उनलाई प्रहरी र परिवार मिलेर कीर्तिपुर अस्पताल लगियो । उपचारको क्रममा उनको मृत्यु भयो ।

केही समयअघि उनलाई डेरामा बसेको कोठा छाडेर जान भनिएको थियो । भाडाको विषयमा घरभेटीसँग मनमुटाव चलिरहेको थियो । लामो समयको लकडाउनले जीविका चल्न छाडेका उनलाई कोठाको भाडा तिर्न हम्मेहम्मे परिरहेको थियो । महर्जनको घरमा दुइवटा कोठा लिएर श्रीमती नीतु र तीन छोराहरुका साथ उनी बस्दै आएका थिए । उनको कोठाको भाडा मासिक चार हजार रुपैयाँ थियो । लकडाउनपछिको पाँच महिनाको घर भाडा तिर्न बाँकी थियो । तीन महिनाको भाडा भने उनले बुझाएका थिए ।

परिवारमा कमाउने उनी मात्रै थिए । उनी सह-चालकको काम गर्थे । घरबेटी महर्जनले कोठा सर्नू भनेपछि उनी नयाँ डेरा सर्ने भइसकेका थिए । केही सामान आफ्नो नयाँ कोठामा समेत पुर्‍याइसकेका थिए । तर, नयाँ कोठा सर्न नपाउँदै उनको हत्या भयो । शम्भुका छोरा राहुलले प्रहरीसँग भनेका छन्, ‘केही दिनअघि दिउँसो बुबा नभएको बेला कोठामा आएर भाडा नदिए मार्ने धम्की दिएका थिए ।’

एकै घरका तीन जना मृत
भदौ, २६ गते भक्तपुर मध्यपुर थिमि नगरपालिका-९ स्थित निकोसेरामा घरभित्रै एकै परिवारका तीन जना मृत अवस्थामा भेटिए । आफ्नै घरमा ३६ वर्षीय सुदीप अधिकारी, उनकी ३४ वर्षीया श्रीमती सम्झना र १५ वर्षीय छोरा सुशान्त मृत अवस्थामा फेलापरेका थिए । सम्झना र सुशान्तलाई धारिलो हतियार प्रयोग गरी हत्या भएको प्रहरीले जनाएको थियो ।

प्रहरीले घटनास्थलबाट धारिलो हतियारसमेत फेला पारेको थियो । सुदीपको शरीरमा भने कुनै चोट देखिएको थिएन । अस्पतालले उनको शरीरमा विष देखाएको थियो । सुदीपका भाई उनीहरुको घरमा जाँदा तीनै जना मृत देखेपछि उनले प्रहरीलाई खबर गरेका थिए । तीनवटै शवलाई पोष्टमार्टमका लागि दुवाकोटस्थित केएमसी अस्पतालमा लगिएको थियो ।

सुदीपमा आर्थिक भार थपिँदै गएपछि समस्यामा परेका थिए । उनीहरु केही समयअघि घर बनाएर सरेको थिए । सुदीपले लकडाउनको समयमा ससुरालीबाट २ लाख रुपैयाँ ऋण लिएको अनुसन्धानले देखिएको थियो । त्यस्तै, घर पनि बैंकमा धितो राखेको देखिएको थियो । श्रीमती र छोरासँग केही समयदेखि विवादसमेत हुने गरेको प्रहरीको अनुसन्धानले देखाएको थियो ।

श्रीमतीलाई छुरा प्रहार
भदौ १८ गते पार्वती खड्काका श्रीमान् अजय काठमाडौँ, अनामनगरस्थित डेरामा जाँड खाएर आए । सधै रक्सी पिएर आउने उनको पार्वतीसँग भनाभन सुरु भयोे । लकडाउनका कारण काम ठप्प थियो । तैपनि, श्रीमान सधैँजसो रक्सी पिएर आएको देखेर पार्वती आजित भइसकेकी थिइन् । राहतको पोको ल्याएर परिवारको पेट पालिरहेकी उनी हरेकपटक रक्सी पिएर आउँदा श्रीमान्लाई रक्सी नपिउन अनुरोध गर्थिन् । पैसाकै विषयलाई लिएर उनीहरुको प्राय झै-झगडा भइरहन्थ्यो ।

त्यस दिन पनि यही विषयमा झगडा भयो । अजितले पार्वतीलाई पिट्न थाले । पार्वतीकी आमा मीना पनि घरमा थिइन् । उनले त्यो घटनालाई सधैँ जस्तै सामान्य ठानिन् । तर त्यो दिन उनले सोचेको जस्तो भएन । केही समयको झै-झगडापछि अजय आफैँ ढोका खोलेर बाहिर निस्किए । पछि आमा मीना पार्वतीको कोठाभित्र जाँदा उनीमाथि छुरा प्रहार भएको थियो । अस्पताल पुग्दा नपुग्दै पार्वतीको मृत्यु भयो । पार्वती र अजयका १४ महिना र ४ महिनाको दुई छोरा अलपत्र परे । 
०००
झापा, शिवसताक्षी नगरपालिकामा भदौ, १६ गते २९ वर्षिय गोमन सिंह मग¬रको हत्या भयो । उनको हत्या ३२ वर्षीय मनकुमार लिम्बुले गरेका थिए । मगरको शव जङ्गलमा फेला परेको थियो । पक्राउ परेका लिम्बुले लेनदेनको विषयमा विवाद हुँदा हत्या गरेको बताएका थिए । 
मगर घरबाट ‘साथीलाई भेट्न जान्छु’ भनी निस्किएका थिए । त्यसपछि भने उनी परिवारको सम्पर्कमा आएका थिएनन् । मोटरसाइकलमा भेट्न गएका मगरलाई मोटरसाइकल चलाइरहेकै अवस्थामा पछाडिबाट लिम्बुले धारिलो हतियारले घाटीमा रेटी हत्या गरेको प्रहरीको अनुसन्धानबाट खुलेको थियो ।
०००
रौतहटमा एक पुजारीको कन्चटमा गोली हानी हत्या भएको थियो । ६५ वर्षीय श्रीराम साहको भदौ ३ गते राति साढे आठ बजे गोली प्रहारबाट हत्या भएको थियो । पछि हत्यामा संलग्न दुई जनालाई प्रहरीले पक्राउ गरेको थियो । पक्राउ पर्नेहरुमा ३६ वर्षिय राम नरेश राउत पटेल र २८ वर्षिय बालकुमार पटेल रहेका थिए ।

प्रहरीसँगको बयानमा उनीहरुले अपराध स्वीकारसमेत गरेका थिए । अनुसन्धानबाट राम नरेश पटेलले कटुवा पेस्तोल प्रयोग गरी हत्या गरेको खुलेको थियो । त्यस्तै, बालकुमार पटेलले भने घटनास्थल नजिक रही मानिसको आवतजावतलाई निगरानी गरेको प्रहरीले जनाएको थियो । राम नरेशका बुवाले पुजारीसँग रकम ब्याजमा लिएको र रकम तिर्ने क्रममा विवाद भएकाले उनको हत्या गरिएको प्रहरीले खुलाएको थियो । 
०००
पछिल्लो समय आर्थिक कारणले ज्यान लिने घटनाको बढ्दो छ । महानगरीय अपराध महाशाखाका प्रमुख एसएसपी दीपक थापाले पहिलेभन्दा अहिले मानिसमा रिस, द्वेष, इष्र्या बढी भएको बताए  । ‘आर्थिक लेनदेनको कुरा आउनेबित्तिकै त्यहाँ ‘इगो’ जन्मिन्छ,’ उनले भने, ‘अहिले कोरोनाले धेरै ऋणमा छन् । कतिको भएको सम्पत्ति पनि डुबेको छ । त्यतै परिस्थितिले घटनालाई गम्भीर मोडतिर लैजाने गरेको देखिएको छ । ‘इगो’ ले जन्माएका घटना सुरुमा हामीलाई थाहा हुँदैन । उजुरी पनि आउँदैन । एकैचोटि घटना घटिसकेपछि मात्रै थाहा हुन्छ ।’