प्रदेश-२ का अस्पतालमा  ४१७ दरबन्दी थप्‍ने निर्णय

जनकपुरधाम : प्रदेश २ सरकारले कोभिड-१९ महामारीसँग लड्न प्रदेशभरका विभिन्‍न अस्पताल तथा प्रयोगशालामा चार सय १७ अस्थायी दरबन्दी थप गर्ने निर्णय गरेको छ । प्रदेश मन्त्रिपरिषद्को सोमबार बसेको बैठकले प्रादेशिक जनस्वास्थ्य प्रयोगशालामा ३३ , प्रादेशिक अस्पतालमा १७४, सिरहा, जलेश्वर, मलंगवा, गौर र कलैया अस्पतालमा ३२/३२ लहान अस्पतालमा २३, र भारदह तथा पोखरिया अस्पतालमा १५/१५ दरबन्दी थप गर्ने निर्णय गरेको हो । 
 
कोभिड विशेषको लागी थप गरिएका दरबन्दीहरूमा एनेस्थेसियोलोजिष्ट देखि लिएर स्वीपरसम्मका पद छन् । थप गरिएका दरबन्दीहरूमा अस्पतालले आवश्यकताको आधारमा तुरुन्त नियुक्त गर्न सकिने व्यवस्था गरिएको छ ।
 
त्यसैगरी मन्त्रिपरिषद्ले जनकपुरको मणिपालमा निर्माण गर्न लागेको बिशेष कोभिड अस्पतालको लागि थप २२७ दरबन्दी स्वीकृत गरेको छ । प्रदेश सरकारले मणिपालमा २० बेड आइसीयूसहित १०० बेड्को बिशेष कोभिड अस्पताल निर्माण गर्न लागेको हो ।

यसैगरी मन्त्रिपरिषद्को बैठकले कोभिड महामारीसँग जुध्‍न प्रदेश सरकारका मन्त्रीहरूलाई जिल्ला-जिल्लाको जिम्मेवारी दिँदै फोकल मन्त्री तोकेको छ । 
सप्तरीमा भूमिव्यवस्था कृषि तथा सहकारीमन्त्री शैलेन्द्र साह, सिरहामाआर्थिक मामिला तथा योजना विजयकुमार यादव, धनुषा र महोत्तरीमाआन्तरिक मामिला तथा कानूनमन्त्री ज्ञानेन्द्रकुमार यादव, सर्लाही र रौतहटमा उद्योग पर्यटन तथा वनमन्त्री रामनरेश राय र बारा तथा पर्सामा भौतिक पूर्वाधार विकासमन्त्री जितेन्द्र सोनललाई फोकल मन्त्रीको जिम्मेवारी दिइएको हो । 
 
जिम्मेवारी तोकिएका मन्त्रीहरू सम्बन्धि जिल्ला र प्रदेश सरकारबीच कोभिड महामारी नियन्त्रणका लागि पूलको रूपमा काम गर्ने छन् ।