सेभिल्लाका गोलरक्षकमाथि आक्रमण

काठमाडौँ- युरोपा लिगअन्तर्गतको खेलका क्रममा एक फुटबल समर्थकले स्पेनिस क्लब सेभिल्लाका गोलरक्षक मार्को डिमित्रोभिकमाथि आक्रमण गरेका छन् । नेदरल्यान्ड्सको पीएसभी एन्डहोभेनविरुद्ध २-० ले पराजित भएपछि समर्थकले मार्कोमाथि आक्रमण गरेका थिए ।

एक समर्थकले खेल मैदानभित्रै छिरेर ३१ वर्षीय मार्कोलाई मुक्काले प्रहार गरेका थिए । तर त्यसपछि मार्कोले उनलाई मैदानमा पछारेका थिए ।

मैदानमा खटिएका सुरक्षाकर्मीहरूले पछि आक्रमण गर्ने समर्थकलाई बाहिर लगेका थिए । सर्वियन खेलाडी मार्कोले यस्तोखाले गतिविधि फुटबलमा राम्रो नभएको तथा यस्ता कार्यमा लाग्नेलाई कारबाही हुनुपर्ने बताए ।