राष्ट्रपति उम्म‍ेद्‌वार छान्‍न कांग्रेस बैठक बस्दै : सिटौलालाई बनाउन प्रधानमन्त्रीको दबाब तर पौडेलकै सम्भावना बलियो

काठमाडौँ- नेपाली कांग्रेसले केन्द्रीय कार्य सम्पादन समितिको बैठक बस्दैछ । आज बिहान साढे ८ बजेका लागि कार्यसम्पादन समितिको बैठकले राष्ट्रपतिको उम्मेद्‌वार चयन गर्नेछ ।

आजको बैठकमा केन्द्रीय कार्यसम्पादन समितिका पदाधिकारी र सदस्यहरूलाई बोलाइएको छ ।

राष्ट्रपति निर्वाचनमा कांग्रेसका उम्मेदवारले सरकारको नेतृत्व गरेको नेकपा माओवादी केन्द्र, एकीकृत समाजवादी, जनता समाजवादी, जनमत, लोकतान्त्रिक समाजवादी, नागरिक उन्मुक्ति र राष्ट्रिय जनमोर्चाले समर्थन गर्ने शुक्रबार साँझको बैठकले निर्णय गरिसकेको छ ।

कांग्रेसमा राष्ट्रपति उम्मेद्‌वार बन्‍न रामचन्द्र पौडेल र कृष्ण प्रसाद सिटौलाले दाबी गरिरहेका छन् । तर राष्ट्रपति उम्मेदवारमा पौडेलको पक्का जस्तै भएको कांग्रेस नेताहरू बताउँछन् ।

कांग्रेसको १४ औँ महाधिवेशनमा तटस्थ बसेर सभापति शेरबहादुर देउवालाई सहयोग गरेका पौडेलले संसदीय दलको चुनावमा पनि प्रस्तावक नै बसेका थिए । त्यतिबेलादेखि नै पौडेललाई राष्ट्रपति बनाउने देउवाले आश्‍वासन दिएका थिए । 

तर सिटौलाले पनि राष्ट्रपति बनाउन दबाब दिइरहेका छन् । प्रधानमन्त्री पुष्पकमल दाहाल प्रचण्डले पनि राष्ट्रपति सिटौलालाई बनाउन देउवालाई दबाब दिँदै आएको कांग्रेसका एक नेताले बताए ।