गठबन्धनबाट राष्ट्रपतिमा रामचन्द्र पौडेलको उम्मेदवारी दर्ता

काठमाडौँ– नयाँ बनेको आठ दलीय गठबन्धनले  राष्ट्रपतिमा नेपाली कांग्रेसका नेता रामचन्द्र पौडेलको नाम मनोनयन दर्ता गराएको छ । शनिबार संसद् भवन बानेश्वरमा रहेको निर्वाचन अधिकृतको कार्यालयमा पुगेर पाैडेलले आफ्नाे नाम राष्ट्रपतिको उम्मेदवारका लागि दर्ता गराएका हुन् । 

पाैडेलको प्रस्तावकमा शेरबहादुर देउवा, माधवकुमार नेपाल, नारायणकाजी श्रेष्ठ, अशोककुमार राई र अब्दुल खान रहेका छन् भने समर्थकमा महन्थ ठाकुर, पूर्णबहादुर खड्का, रञ्जिता श्रेष्ठ, चित्रबहादुर केसी र हितराज पाण्डे रहेका छन् ।

पौडेललाई माओवादी केन्द्र, जसपा, नेकपा एस, नागरिक उन्मुक्ति पार्टी, लोसपा, जनमत पार्टी र राष्ट्रिय जनमोर्चाले समर्थन गरेका हुन् ।

शनिबार बिहान बसेको कांग्रेसको कार्यसम्पादन समितिको बैठकले रामचन्द्रलाई राष्ट्रपतिमा उठाउने निर्णय गरेको थियो । यसअघि बसेको गठबन्धनको निर्णयले राष्ट्रपतिमा कांग्रेसलाई सघाउने निर्णय गरेको थियो । 

यसअघि एमालेले राष्ट्रपतिमा सांसद सुवास नेम्वाङको नाम मनोनयन दर्ता गराइसकेको छ ।