राष्ट्रपति/उपराष्ट्रपति निर्वाचन : भोलिदेखि आचारसंहिता लागू हुने

काठमाडौं - राष्ट्रपति/उपराष्ट्रपति निर्वाचनका लागि बुधबारबाट आचारसंहिता लागू हुने भएको छ । आचारसंहिता चैत ५ गतेसम्म लागु हुने निर्वाचन आयोगका प्रवक्ता शालिग्राम शर्मा पौडेलले जानकारी दिए । आचारसंहिता नेपाल राजपत्रमा प्रकाशन भइसकेको छ । 'दुवै पदको निर्वाचनका लागि निर्वाचन आयोग ऐन, २०७३ को दफा २२ ले दिएको अधिकार प्रयोग गरी आयोगले २०७९ फागुन १७ गतेदेखि चैत ५ गतेसम्म कायम रहने गरी निर्वाचन आचारसंहिता, २०७९ जारी गर्ने निर्णय गरेको छ,' विज्ञप्तिमा भनिएको छ । 

आउँदो फागुन २५ गते राष्ट्रपतिको र आगामी चैत ३ गते उपराष्ट्रपतिको निर्वाचन हुँदैछ । निर्वाचनका संघीय संसद्मा हाल कायम रहेका ३३२ र प्रदेशसभाका ५५० गरी कुल ८८२ मतदाता रहेका छन् । राष्ट्रपतिमा नेपाली कांग्रेसका नेता रामचन्द्र पौडेल र नेकपा एमालेका नेता सुवास चन्द्र नेम्वाङ प्रतिस्पर्धामा छन् । 

क-कसलाई लाग्छ आचारसंहिता ?

(क) नेपाल सरकार र नेपाल सरकारका मन्त्री, 
(ख) प्रदेश सरकार र प्रदेश सरकारका मन्त्री, 
(ग) संघ, प्रदेश र स्थानीय तहका कर्मचारी, 
(घ) सुरक्षा निकाय, सुरक्षाकर्मी तथा कर्मचारी, 
(ङ) सरकारी, अर्धसरकारी तथा सार्वजनिक संस्थाको कार्यालय तथा कर्मचारी, 
(च) राजनीतिक दल तथा राजनीतिक दलको भातृ सङ्गठन, 
(छ) उम्मेदवार तथा उम्मेदवारको प्रतिनिधि, 
(ज) राजनीतिक दल तथा उम्मेदवारको मतदान एवम् मतगणना प्रतिनिधि, 
(झ) सार्वजनिक पद धारण गरेको व्यक्ति, 
(ञ) सञ्चार प्रतिष्ठान, सोका कर्मचारी तथा सञ्चारकर्मी, 
(ट) मतदाता