गण्डकी प्रदेश प्रमुखको अभिव्यक्ति संविधान र संसदीय पद्धतीविपरीत : खाण

काठमाडौँ : नेपाली कांग्रेसका प्रतिनिधि सभाका प्रमुख सचेतक बालकृष्ण खाणले गण्डकी प्रदेशकी नवनियुक्त प्रदेश प्रमुख सिता पौडेलले संविधानमा उल्लेखित व्यवस्था र संसदीय पद्धतीविपरीत अभिव्यक्ति दिएको बताएका छन् । संविधान अनुरुप ‘सेरेमोनिएल पद’ मा नियुक्त प्रदेश प्रमुखले जनप्रतिनिधिहरूको संस्थाका प्रमुखमाथिको टिप्पणी स्वीकार्य नहुने प्रमुख सचेतक खाणले बताए । 

नवनियुक्त प्रदेश प्रमुख पौडेलले आज पदभार ग्रहण गर्दै ‘सभामुखको राजीनामा माग्‍ने घडी आइसक्यो । जिम्मेवारी सबै सभामुखले लिनुपर्छ । समस्याको कसरी निकास निकाल्ने हो, सभामुखले कार्ययोजना ल्याउनुपर्छ’ भन्‍ने अभिव्यक्ति दिएकी थिइन् । 

‘प्रदेश प्रमुखले जनप्रतिनिधिहरूको संस्थाका प्रमुखबारे टिकाटिप्पणी गर्नु उचित हुन्न । प्रदेश प्रमुख एउटा संवैधानिक अंग हो, तसर्थ संविधान अनुसार ‘सेरेमोनिएल पोजिसन’मा बस्‍नुपर्छ,’ खाणले इकागजसँग भने, ‘उनले यस्तो अभिव्यक्ति दिएर पूर्ण सर्वसत्तावाद र निरंकुशताको बलमै आफ्नो भूमिकालाई हस्तक्षेपकारी बनाउन खोजेकी हुन् । त्यो कदापी स्वीकार्य हुन सक्दैन ।’
 
राजनीतिक दल र सरकारसँग कुरा गरी सहमतिमा र त्यसो हुन नसके संविधान र त्यसअन्तर्गत बनेका कानुन अनुरुप सदन चलाउने दायित्व सभामुखको भएको खाणले बताए । ‘सभामुखको भूमिकाका विषयमा सांसदहरूले प्रश्‍न उठाउन सक्छन् । प्रदेश प्रमुखले प्रश्‍न उठाउने पद्धती संसदीय संघीयता भएका मुलुकमा हुँदैन ।’