मुग्लिन-पोखरा सडक राति चार घण्टा बन्द हुने

प्रतिकात्मक तस्बिर

काठमाडौं - पृथ्वी राजमार्ग अन्तर्गत मुग्लिन-पोखरा सडकखण्ड आजदेखि रातिमा दैनिक ४ घण्टा बन्द हुने भएको छ । पोखरा सडकखण्ड योजना पूर्वी खण्ड तनहुँका अनुसार बिमलनगरदेखि दमौलीको घाँसीकुवा सडकखण्डमा भित्तो काट्ने काम गर्नुपर्ने भएकाले आज राति १२ बजेदेखि बिहान चार बजेसम्म १० दिन राजमार्ग बन्द हुने भएको हो । आयोजनाका प्रमुख नगेन्द्र सुवेदीका अनुसार दिउँसोको भन्दा रातिमा सवारीको चाप कम हुने हुँदा रातको समयलाई प्राथमिकतामा राखिएको बताए ।

आयोजनाले रात १२ बजेदेखि बिहान ४ बजे अघि र पछि मात्रै यात्रा गर्न अनुरोधसमेत गरेको छ ।

तनहुँको आँबुखैरहनीदेखि कास्कीको पोखरा जाने पृथ्वी राजमार्ग विस्तारको काम निकै सुस्त गतिमा अगाडि बढेको भन्दै कामको गति बढाउन दबाब परेको छ ।