तराई-काठमाडाैं जाेड्ने वैकल्पिक मार्ग कान्तिलोकपथ बन्द

फाइल तस्बिर

मकवानपुर । तराई र संघीय राजधानी काठमाडौ जोड्ने वैकल्पिक मार्ग कान्ति लाेकपथ पनि बन्द गरिएको छ । 

मधेस प्रदेशबाट हेटौंडा हुँदै काठमाडौं ओहोरदोहोर गर्ने कान्ति लोकपथ आजदेखि चैत १० गतेसम्मको लागि बन्द गरिएको हो । मकवानपुर जिल्लाको हेटौँडा हुँदै ललितपुर जोड्ने कान्ति लोकपथ मर्मतको लागि बन्द हुने भएको हो ।

कान्तिलोकपथ मर्मतका लागि फागुन १८ गतेदेखि आगामी चैत १० गतेसम्मको समय निर्धारण गरेको छ ।

मकवानपुरको ठिङ्गननजिक रहेको बागमती पुलबाट ललितपुरतर्फ सडक मर्मत एवं कालोपत्रेका लागि कान्ति लोकपथ बन्द गरिएको जनाइएको छ । सडक बन्द भएपछि यात्रुहरु भने समस्यामा परेका छन् ।

मकवानपुरका प्रमुख जिल्ला अधिकारी राजेन्द्रदेव पाण्डेको अध्यक्षतामा गत सोमबार बसेको बैठकले आजदेखि कान्तिलोकपथको दुईतर्फी बन्द गर्ने निर्णय गरेको हो । आजदेखि लागू हुने गरी कान्ति लोकपथमा दुईतर्फी सवारी साधनको आवागमन पूर्णरूपले बन्द गरी हेटौँडा–काठमाडौँ चल्ने सुमोलगायतका साना सवारी साधनका व्यवसायीलाई सिस्नेरी र चित्लाङ सडकमा एकतर्फी सवारी सञ्चालनको व्यवस्था मिलाउने गरी निर्णय गरिएको छ ।

बन्द अवधिका लागि हेटौँडाबाट काठमाडौँ जान हेटौंडा–भीमफेदी–कुलेखानी–सिस्नेरी–दक्षिणकाली रूट हुँदै एकतर्फी र काठमाडौँबाट हेटौँडा आउन थानकोट–चित्लाङ–मार्खु–कुलेखानी–भीमफेदी रूट हुँदै एकतर्फी यातायात सेवा सञ्चालन गर्ने व्यवस्था गरिएको छ ।