राष्ट्रिय सभा उपनिर्वाचन : आज उम्मेदवारी दर्ता

मतदानस्थल भुटनदेवी मावि ।

हेटौँडा : राष्ट्रिय सभामा बागमती प्रदेशबाट प्रतिनिधित्व गर्ने एक सदस्यको रिक्त पदका लागि हुने उपनिर्वाचन कार्यक्रमअन्तर्गत आज उम्मेदवारी दर्ता हुँदैछ । राष्ट्रिय सभा सदस्य रामबहादुर थापालाई नेकपा माओवादी केन्द्र पदमुक्त गरेपछि रिक्त रहेको पदमा उपनिर्वाचन हुन लागेको हो । 

बागमती प्रदेशको राजधानी हेटौंडामा हुने निर्वाचन कार्यक्रमअन्तर्गत निर्वाचन अधिकृतको कार्यालयले मतदाताको अन्तिम नामावली प्रकाशन गरिसकेको छ । उम्मेदवारी दर्ता कार्यक्रमको अघिल्लो दिन बिहीबार निर्वाचन अधिकृतको कार्यालयले निर्वाचनमा सहभागी हुने राजनीतिक दलका प्रतिनिधिहरुसँग निर्वाचन कार्यक्रमबारे अन्तरक्रिया गरेको थियो । राष्ट्रिय सभा सदस्यको उपनिर्वाचनमा नेकपा एमाले, नेपाली कांग्रेस, माओवादी केन्द्र, राष्ट्रिय जनता पार्टी र नेपाल मजदुर किसान पार्टीका प्रतिनिधिको सहभागितामा अन्तरक्रिया भएको हो ।

राष्ट्रिय सभा सदस्यको उपनिर्वाचनमा बागमती प्रदेश सभा सदस्य ११० जना र बागमती प्रदेशका ११८ स्थानीय तहका प्रमुख र उपप्रमुख २ सय २८ जनाले मतदान गर्नेछ्न । प्रदेश सभा सदस्यको १ मत बराबर ४८ मतभार रहेको छ भने नगर प्रमुख, उपप्रमुख, गाउँपालिका अध्यक्ष, उपाध्यक्षको १ मत बराबर १८ मतभार रहेको छ । बागमती प्रदेशको ११० मतसंख्या बराबर ५२८० मतभार र स्थानीय तहको प्रमुख, उपप्रमुख २३८ मतसंख्याको ४२८४ मतभार रहेको छ । प्रदेशमा ३ सय ४८ जनाले मतदान गर्नेछन् जसको मतभार ९ हजार ५ सय ६४ रहनेछ । 

मतदान कार्यक्रम आगामी जेठ ६ गते हेटौंडास्थित भुटनदेवी माविमा हुनेछ । भुटनदेवी मावि परिसरमा २ मतदान केन्द्र तोकिएको छ । प्रदेश सभा सदस्यको लागि मतदान केन्द्र क र नगर प्रमुख, उपप्रमुख, गाउँपालिका अध्यक्ष, उपाध्यक्षको लागि मतदान केन्द्र ख रहने गरी आयोगले तोकेको छ ।