जिम्बाबेविरुद्धको दोस्रो टेस्टमा पाकिस्तानका अबिद र अजहरको शतक

काठमाडौँ : जिम्बाबेविरुद्धको दोस्रो टेस्ट क्रिकेटको पहिलो पालीमा पाकिस्तानका दुई जना शीर्ष वरियताका ब्याट्सम्यानले शतक बनाएका छन् । हरारेमा टस जितेर ब्याटिङ सुरु गरेको पाकिस्तानले पहिलो दिनको खेल सकिदा दुई शीर्ष वरियताका ब्याट्सम्यानको शतकमा ४ विकेट गुमाएर २६८ रन बनाएको छ ।

उसका लागि ओपनर अबिद अलि नटआउट ११८ रन बनाएर क्रिजमा छन् । यस्तै अजहर अलि १२६ रन बनाएर आउट भए । शतक बनाउँदा समान १७ चौका प्रहार गरेका दुबै ब्याट्सम्यानले दोस्रो विकेटका लागि २३८ रनको साझेदारी गरेका थिए ।

१२ रन बनाउँदा पहिलो विकेटका रुपमा इमरान बटलाई गुमाएको पाकिस्तानले दोस्रो विकेटका लागि अबिद र अजहरले २२८ रनको साझेदारी गरेका हुन् । अहजर अलि आउट भएपछि क्रिजमा आएका कप्तान बाबर अजाम र फावद आलम पनि टिकेनन् । उनीहरु क्रमशः २ र ५ रन बनाएर आउट भए ।

जिम्बाबेका ब्लेसिङ मुजाराबानीले ३ विकेट लिएका छन् । क्रिजमा अबिद अलिलाई साथ दिन सजिद खान आएका छन् । आज पाकिस्तानले ९० ओभरबाट दोस्रो दिनको खेल थाल्नेछ । पहिलो टेस्ट पाकिस्तानले जितेको छ । 

जिम्बाबे भ्रमणमा रहेको पाकिस्तानले यसअघि भएको तीन खेलको टी-ट्वान्टी सिरिज पनि २-१ ले जितेको थियो ।