बाबुराम निवासमा जसपा पदाधिकारी बैठक

काठमाडौँ :  जनता समाजवादी पार्टी (जसपा) को पदाधिकारी बैठक सुरु भएको छ । संघीय परिषद् अध्यक्ष डा.बाबुराम भट्टराईको निवास टोखामा बैठक सुरु भएको जसपाका एक नेताले जानकारी दिए । 

आजमात्रै प्रधानमन्त्री केपी शर्मा ओली र कांग्रेस सभापति शेरबहादुर देउवालाई भेटेर प्रधानमन्त्रीविरुद्ध अविश्वासको प्रस्तावको पक्षमा मतदान नगर्ने र तटस्थ बस्ने खबर सुनाएर आएका अध्यक्ष महन्थ ठाकुर र राजेन्द्र महतोसहितको बैठक सुरु भएको हो । बैठकमा महन्थ, महतोसहित डा.बाबुराम भट्टराई, उपेन्द्र यादव, अशोक राईलगायतका नेता सहभागी छन् ।

 जसपाकै संघीय परिषद् अध्यक्ष भट्टराई र अर्का अध्यक्ष यादव प्रधानमन्त्री ओलीविरुद्ध अविश्वासको मत दिनुपर्ने र नयाँ सरकार गठन हुनुपर्ने कुरा उठाउँदै आएका छन् । आजको पदाधिकारी बैठकले के निर्णय गर्छ भनेर चासोका साथ हेरिएको छ । अध्यक्ष ठाकुर सुरुदेखि नै ओली सरकारमा जाने विषयमा सकरात्मक भएपनि पार्टीमा बहुमत जुटाउन नसकेपछि ब्याक भएर तटस्थ हुने निर्णय लिएका हुन् ।