खनाल-नेपाल समूहको स्थायी कमिटी बैठक जारी

काठमाडौँ ।  सत्तारुढ नेकपा एमालेको खनाल नेपाल समूहको स्थायी कमिटी बैठक जारी छ । आफ्ना पक्षका प्रत्यक्ष निर्वाचित सांसदहरुको सामूहिक राजीनामा बुझाउने विषयमा भर्चुअल बैठक जारी रहेको नेताहरुले बताएका हुन् । 

सांसद विरोध खतिवडाका अनुसार प्रधानमन्त्री केपी शर्मा ओली सहमतिमा नआएपछि राजीनामा दिनुपर्ने निचोडका साथ छलफल भइरहेको बताउँछन् । 
नेपाल समूहकै केही सांसदले भने राजीनामा दिन नहुने बताउँदै आएका छन् । 

प्रधानमन्त्री केपी शर्मा ओलीले भोलि (बैशाख २७) प्रतिनिधि सभामार्फत विश्वासको मत लिने कार्यसूची तय भएको छ । एमालेकै नेपाल समूहभित्र प्रधानमन्त्री ओलीलाई विश्वासको मत दिन नहुने मत धेरै छ ।

आजमात्रै जनता समाजवादी पार्टीका अध्यक्ष महन्थ ठाकुर र वरिष्ठ नेता राजेन्द्र महताले प्रधानमन्त्री ओली र कांग्रेस सभापति शेरबहादुर देउवालाई भेटेर विश्वासको मत नदिने बताउँदै तटस्थ बस्ने जानकारी गराएको थियो । जसपाका संघीय परिषद् अध्यक्ष डा.बाबुराम भट्टराईको निवासमा अहिले पदाधिकारी बैठक जारी छ ।