खनाल-नेपाल समूहको बैठक बस्‍दै : आउला त सामूहिक राजीनामा ?

काठमाडौँ : नेकपा एमालेको खनाल-नेपाल समूहको बैठक आज साढे ९ बजे बस्‍दैछ । बैठकमा आज संघीय संसदमा हुने विश्वासको मतको विषयमा छलफल हुँदैछ । आइतबार प्रधानमन्त्री केपी शर्मा ओलीलाई सच्चिएर आउन उक्‍त समूहले आज बिहान ९ बजेसम्मको अल्टिमेटम दिएको थियो । खनाल-नेपाल समूहले ओलीलाई दिएको समयसिमा सकिएको छ ।

सर्वोच्च अदालतको आदेशले दुईवटा पार्टीको एकतालाई भंग गरेपछि पार्टीलाई पूर्ववत रुपमा नै संञ्चालन गर्नुपर्ने अडान लिँदै आएको खनाल-नेपाल समूहले सोही अडानमा अडिग रहँदै त्यसमा अध्यक्षको केपी शर्मा ओलीको प्रतिबद्धता खोजेको हो ।

खनाल-नेपाल समूहले सामूहिक राजीनामा दिने वा फ्‍लोर क्रस गर्ने निर्णय लिने उक्त समूहका नेता तथा सांसद विरोध खतिवडाले बताए । सांसद खतिवडाले यदि ओली नसच्‍चिए सबै सांसद जम्‍मा भएर सामूहिक राजीनामा दिने दाबी गरे ।

खनाल-नेपाल समूहका सांसदको आइतबार सिंहदरबारमा बसेको बैठकले अध्यक्ष ओलीलाई २०७५ जेठ २ गते फर्किएर पार्टीलाई सहमतिका साथ अघि बढाउने प्रतिबद्धताका लागि आज बिहान साढे ९ बजे सम्मको समय दिएको हो ।

नेता योगेश भट्टराईले साढे ९ बजेसम्म प्रधानमन्त्री एवं पार्टी अध्यक्षले आफूहरुको मागका सम्बन्धमा प्रतिबद्धता नआए त्यसपछि कठोर निर्णय गर्ने चेतावनी दिएका थिए । आज प्रधानमन्त्री ओलीले प्रतिनिधि सभाको बैठकबाट विश्वासको मत लिने कार्यक्रम छ । नेता भट्टराईले अध्यक्षबाट प्रतिबद्धता आए बैठकमा उपस्थित भएर विश्वासको मतको पक्षमा मतदान गर्ने र प्रतिवद्धता नआए कठोर निर्णय गर्ने बताएका थिए । 

ओलीले आफ्नो दायित्व र जिम्मेवारी पुरा नगरेको उक्त समूहको निष्कर्ष छ ।  ‘आइतबार मात्रै उहाँले एउटा वक्तव्य दिनुभएको छ र पार्टीको एउटा पक्षलाई लाञ्छित गर्ने खालको शब्द वक्तव्यमा समावेश गर्नुभएको छ,’ उनले भने, ‘त्यसप्रति हामीले चिन्ता व्यक्त गरेका छौँ र पार्टी अध्यक्षलाई फेरि पनि एकताको पक्षमा गम्भीरताका साथ आगाडि बढ्न ध्यानाकर्षण गरेका छौँ ।’