विराटनगरमा सुर्तीजन्य पदार्थको सेवन निषेध

फाइल फोटो

विराटनगर - विराटनगर महानगरपालिकाले नयाँ वर्षसँगै भोलिदेखि नगरको सार्वजनिक स्थलमा सुर्तीजन्य पदार्थको सेवनमा निषेध गरेको छ ।

नगरलाई सफा, सुन्दर, उज्यालो, व्यवस्थित र विकसित बनाउने अभियानमा लागेको महानगरले सो निर्णयअनुरूप आज नगर क्षेत्रमा सचेतनामूलक प्रभातफेरि निकालेको छ । महानगर परिसरबाट सुरु भएको प्रभातफेरि नगरका विभिन्न भागको परिक्रमापछि सहिद रङ्गशालामा पुगेर समापन भएको थियो । कार्यक्रममा महानगरका कार्यवाहक प्रमुख काजीबहादुर बस्नेत, मोरङका प्रमुख जिल्ला अधिकारी तीर्थराज भट्टराई, प्रमुख प्रशासकीय अधिकृत विष्णुप्रसाद कोइरालालगायतले बोलेका थिए । 

पहिलो चरणमा विद्यालय, स्वास्थ्य संस्था, महानगर र महानगरसँग सम्बन्धित वडा कार्यालय तथा स्वास्थ्य संस्था, बसपार्क र बसमा सुर्तीजन्य पदार्थ सेवन गर्न पाइने छैन । विराटनगरको नाला सफा गर्दा ७० प्रतिशत सुर्तीजन्य पदार्थका खोल पाइने भएकाले पनि यो निर्णय भएको बताइएको छ ।

नगरसभाले गरेको निर्णयलाई वैशाख १ गतेदेखि कडाइका साथ कार्यान्वयनमा ल्याइने र यसबाट सहर सफा, सुन्दर देखिने विश्वास लिइएको छ । यस कार्यमा वडाध्यक्षदेखि वडा सदस्य, जनप्रतिनिधि, सुरक्षा निकायका प्रमुख, विभिन्न संघसंस्थाका प्रतिनिधि, समाजसेवी, सञ्चारकर्मीको साथ सहयोग रहने महानगरले विश्वास लिएको छ ।
रासस