प्रेस खरिदमा ६९ करोड घोटाला, सुरक्षण मुद्रण केन्द्रका सीईओ पौडेलसहित ९ विरुद्ध मुद्दा दर्ता

काठमाडौं । सुरक्षण मुद्रण केन्द्रका सीईओ विकल पौडेलसहित ९ जनाविरुद्ध सेक्युरिटी प्रिन्टिङ प्रेस र प्रेसराइज्ड फ्युल स्टोरेज टेंकको पावर सिस्टम खरिदमा भ्रष्टाचार गरेको भन्दै मुद्दा दर्ता भएको छ ।

अख्तियार दुरुपयोग अनुसन्धान आयोगले उनीसहित ९ जनाविरुद्ध आइतबार विशेष अदालतमा मुद्दा दायर गरेको हो । सीईओ पौडेलविरुद्ध ६९ करोड ८ लाख ८१ हजार ८५४ रुपैयाँ बिगो दाबी गरिएको छ । 

हाल बन तथा वातावरण मन्त्रालयमा रहेका तत्कालीन मेकानिकलतर्फका सीडिई नवीनकुमार पोखरेल, हाल राष्ट्रिय सूचना प्रविधि केन्द्रमा कार्यरत रहेका तत्कालीन सहायक निर्देशक रमेशप्रसाद पोखरेल, शाखा अधिकृत मनिकमान महर्जन, तत्कालीन लेखा अधिकृत रामबहादुर बुढा, शाखा अधिकृत शिरिष उपाध्याय, इन्जिनियरिङ मार्केटिङ कन्सर्नका प्रबन्ध निर्देशक रोहितमान प्रधान, मेपटेक विल्डिङ सर्भिसेस प्रालिका निर्देशक भुवन महर्जन र परामर्शदाता वास्तुशिल्प एसोसिएट्सका प्रबन्ध निर्देशक मित्रलाल गुरौविरुद्ध मुद्दा दर्ता गरिएको अख्तियारले जनाएको छ ।

तत्कालीन सीडीई नवीनविरुद्ध ४९ करोड ४६ लाख ३५ हजार ९ सय ४५ रुपैयाँ, तत्कालीन सहायक निर्देशक रमेशविरुद्ध २० करोड ३८ लाख ९३ हजार ८२७ रुपैयाँ बिगो माग गरि मुद्दा दर्ता गरिएको हो ।