मानहुँ डाँडामा खिचिएको ‘आर्या’ को गीत सार्वजनिक

काठमाडौं: लकडाउनको समयमा भाइरल भएको पर्यटकीयस्थल मानहुँ डाँडामा खिचिएको फिल्म ‘आर्या’को गीत सार्वजनिक भएको छ । निर्माण टिमले मानहुँ डाँडाले पाइरहेको चर्चासँगै गीतको पनि चर्चा हुने अपेक्षासहित  फिल्ममा समावेश ‘हाम्रो धर्ती’ बोलको गीत रिलिज गरेको हो । 

फिल्म निर्देशक उपेन्द्र तिमल्सिनाले मानहुँको चर्चाको सन्दर्भ पारेर गीत रिलिज गरेको जानकारी गराए । ‘अहिले यो ठाउँको अचानक चर्चा चलेको छ । यही चर्चाको सन्दर्भ पारेर हामीले त्यही ठाउँमा खिचेको गीत सार्वजनिक गर्ने निर्णय गरेका हौं,’ उपेन्द्रले भने । मेलिना राईको स्वर र लक्ष्मण सिटौलाकाे शब्द रहेको गीतलाई राम सिटौलाले संगीत गरेका हुन् । संगीतकार सिटौलाले राष्ट्र भावको गीतलाई छायांकनस्थलको छनोटले थप सुन्दर बनाएको बताए ।

‘गीत जति मीठो थियो त्यसलाई छायांकनस्थल र छायांकनले थप सुन्दर बनाएको अनुभूति भएको छ । फिल्मका बाँकी गीत पनि उत्तिकै श्रुति मधुर छन्,’ रामले भने । 
गीत सार्वजनिक भए पनि फिल्मको प्रदर्शन मिति भने टुंगो लाग्न सकेको छैन । निर्देशक उपेन्द्रले लडडाउन खुले लगत्तै फिल्म प्रदर्शन गर्ने योजना रहेको जानकारी गराए । दिव्यराज सुवेदीको छायांकन र कविराज गहतराजले कोरियोग्राफी गरेको गीतको भिडियोमा शिल्पा पोखरेलले अभिनय गरेकी छिन् ।  फिल्ममा अनुप विक्रम शाही, प्रकाश शाह, रवि गिरी, सुशिल पोखरेललगायतका कलाकारको अभिनय छ ।