हत्या आरोपमा धनुषाबाट ३ जना पक्राउ

जनकपुरधाम : धनुषा प्रहरीले हत्या आरोपमा धनुषाबाट ३ जनालाई पक्राउ गरेको छ । गत कात्तिक ३० गते गणेशमान चारनाथ नगरपालिका ९ बरमझियामा कुटपिटबाट मृत्यु भएका वडा नम्बर २ निवासी सरोज साहको हत्या आरोपमा उनीहररुलाई पक्राउ गरिएको प्रहरीले जनाएको छ ।

पक्राउ पर्नेमा स्थानीय पवन शर्मा, श्रवण शर्मा र प्रमोद महरा रहेको इलाका प्रहरी कार्यालय ढल्केवरका प्रमुख प्रहरी निरीक्षक तिर्थ कार्कीले जानकारी दिए ।

उनका अनुसार बरमझियाकै एक पसलमा बसेको बेला सामान्य विवाद हुँदा कुटाकुट भएको थियो । कुटाइबाट साह गम्भीर घाइते भएका र उपचारको क्रममा विराटनगरस्थित एक अस्पतालमा मृत्यु भएको प्रहरी निरीक्षक कार्कीले बताए । 

घटनाकै दिन आरोपितहरुलाई कुटपिटको आरोपमा पक्राउ गरिएको थियो । तर साहको मृत्यु भएपछि आरोपितलाई नियन्त्रणमै राखि अनुसन्धान प्रक्रिया अघि बढाइएको उनले बताए ।

घटनाबारे अनुसन्धान भइरहेको प्रहरीले बताएको छ ।