ए डिभिजन लिग : एनआरटीमाथि फ्रेन्ड्सको सहज जित

काठमाडौं । राजधानीमा जारी सहिद स्मारक ए डिभिजन लिग फुटबलमा फ्रेन्ड्स क्लबले सहज जित निकालेको छ । मंगलबार त्रिपुरेश्वरस्थित दशरथ रंगशालामा भएको खेलमा फ्रेन्ड्सले न्युरोड टिम एनआरटीलाई ३–१ गोल अन्तरले पराजित गरेको हो । 

खेलको १४ औं मिनेटमा राफिक अमिनुुले गोल गर्दै फ्रेन्ड्सलाई सुरुआती अग्रता दिलाएका थिए । खेलको ४१ औं मिनेटमा सन्जिव विष्टले गोल गर्दै एनआरटीलाई १–१ गोलको बराबरीमा ल्याए । पहिलो हाफको इन्जुरी समयमा टोरिक जेब्रिनले गोल गर्दै फ्रेन्ड्सलाई २–१ को अग्रता दिलाए । त्यसपछि खेलको ७६ औं मिनेटमा कप्तान प्रकाश बुढाथोकीले गोल गर्दै फ्रेन्ड्सलाई ३–१ को जित दिलाए । फ्रेन्ड्सको यो चौंथो जित हो । फ्रेन्ड्सले १२ खेलमा १४ अंक जोडेको छ । एनआरटीले १२ खेलमा १३ अंक जोडेको छ ।