सौगात–अनुपलाई लिएर ‘चोर पुलिस’घोषणा

काठमाडौँ - फिल्म घोषणा गरेर पनि नबनाउने बानी परेका मुकुन्द भट्टले फेरि अर्को फिल्म घोषणा गरेका छन् । उनले कलाकारको जम्बो टोली लिएर ‘चोर पुलिस’ बनाउने घोषणा गरेका हुन् । कमेडी श्रेणीमा बन्ने फिल्मलाई म्याक मिडियाले बनाउने भएको हो । फिल्मलाई सुदीचन्द्र बख्रेलले निर्माण गर्नेछन् । समिर खरेल र सुमन ढकाल कार्यकारी निर्माताको रहने निर्माण टिमले जनाएको छ ।

भट्टले यसअघि बलिउड अभिनेता सुनिल सेठ्ठीलाई समेत लिएर ‘एक्स नाइन’ बनाउने घोषणा गरे पनि त्यो फिल्म बनेको थिएन । अनमोल केसीसमेत रहेको सो फिल्म बेलामा नबनेपछि अनमोलले पैसा फिर्ता दिएको समाचार आएका थिए । फिल्मलाई  मुकुन्द भट्ट, नरेश नाथ योगी र सुमन सुनार मिलेर लेखेका हुन् भने फिल्ममा पुरुषोत्तम प्रधानको छायांकन, दीपक आर जे  र राजु भट्टको संगीत रहनेछ ।  

फिल्ममा सौगात मल्ल ,अर्पण थापा , शक्ति श्रेष्ठ , पुष्प खड्का , अनुप बिक्रम शाही , कामेश्वर चौरसिया , सुपर गुरुङ , प्रमिला उप्रेती , इन्द्रप्रसाद खरेल , छनोट भैसकेका छन् भने मुख्य नायिका छनोट हुन बाँकी रहेको निर्देशक भट्टले बताएका छन् । चलचित्र को छायांकन अमेरिका ,क्यानाडा , अस्ट्रेलिया र नेपालमा हुनेछ ।