वैकल्पिक ऊर्जा प्रवर्द्धन केन्द्रको कार्यकारी निर्देशकमा नवराज ढकाल नियुक्त

काठमाडौँ- नेपाल सरकारले वैकल्पिक ऊर्जा प्रवर्द्धन केन्द्रको कार्यकारी निर्देशकमा नवराज ढकाललाई नियुक्त गरेको छ । मन्त्रिपरिषदको आज मंगलबार बसेको बैठकले ढकाललाई चार वर्षका लागि केन्द्रको कार्यकारी निर्देशकमा नियुक्त गरेको हो ।

ऊर्जा मन्त्रालयले रिक्त कार्यकारी निर्देशक पदमा खुला प्रतिस्पर्धाका आधारमा छनौट गर्न गत फागुन १४ गते प्रस्तावसहितको दरखास्त आव्हान गरेको थियो ।
सिफारिस समितिले उम्मेदवारको योग्यता, अनुभव, व्यावसायिक कार्ययोजनासहितको प्रस्तावको मूल्यांकन तथा प्रस्तुतीकरण र अन्तर्वार्तासमेतबाट तीन जनाको नाम सिफारिस गरेको थियो ।

सिफारिस समितिको सिफारिसमा केन्द्रमै कार्यरत ढकालसहित डा. सूर्यकुमार सापकोटा र जल तथा ऊर्जा आयोग सचिवालयमा कार्यरत डा. किरण गौतम परेका थिए ।

सिफारिसमा परेकामध्ये मन्त्रिपरिषदले ढकाललाई नियुक्त गरेको हो । ढकालले आफू छनौटमा परेको अनौपचारिक जानकारी आएको औपचारिक पत्र प्राप्त गरिनसकेको इकागजलाई बताए । 

यसअघिका कार्यकारी निर्देशक डा. मधुसूदन अधिकारीको कार्यकाल समाप्त भएपछि ढकाल नै निमित्त कार्यकारी निर्देशकका रूपमा केन्द्रमा कार्यरत थिए ।