प्रदेश अस्पतालमा चाप बढ्दो, अधिकांश स्वास्थ्यकर्मी करारका

सुर्खेत- पछिल्लो समय सुर्खेतस्थित प्रदेश अस्पतालमा बिरामीको चाप बढ्दो छ । गर्मीयाम बढेसँगै दिनप्रतिदिन अस्पतालमा बिरामीको चाप बढ्दो क्रममा रहेको अस्पतालले जनाएको छ । बिरामीको चाप बढी भएर थेग्नै सकस भएको अस्पतालका सूचना अधिकारी विनोद बस्नेतले जनाए ।

कर्णाली प्रदेशका १० वटा जिल्ला र सुदूरपश्चिमका केही जिल्लाका बिरामीहरू सेवा लिन यहाँ आउने गर्दछन् । अस्पतालमा अहिले दैनिक १ हजार भन्दा बढी बिरामी आउने गरेको बस्नेले बताए । धेरै बिरामी भएकाले साँझ ५ बजेसम्म अस्पतालको ओपीडीमै लाइन देखिने गरेको छ ।

अस्पतालमा अहिले तीन सय बेड सञ्चालनमा छन् । अस्पतालमा अप्रेशन गर्ने बिरामीको पनि चाप बढिरहेको छ । अहिले अस्पतालमा झन्डै ५० जनाको विभिन्न शल्यक्रिया हुने गरेको छ । इमर्जेन्सीबाहेक अन्य बिरामीले अप्रेशनका लागि लामो समयसम्म अस्पतालमा पालो कुर्नुपर्ने अवस्था छ ।

प्रदेश अस्पतालमा बिरामी चेकजाँचसँगै मिर्गौला र पित्तथैलीको पत्थरीको अप्रेशन गरिरहेको छ, जसमा दैनिक १० जनासम्मको अप्रेशन भइरहेको छ  । त्यस्तै एपेन्डिसाइड, गर्भवतीको सीएस, हाडजोर्नी, मेरुदण्ड र न्युरो सर्जरी पनि भइरहेको छ । त्यसैगरी हप्ताको दुई दिन आँखाको मोतियाविन्दु र अन्य अप्रेशन पनि हुने गरेकाे उनको भनाइ छ ।

अहिले अस्पतालमा साढे ४ सय कर्मचारी कार्यरत छन्  । तीमध्ये झन्डै ८० प्रतिशत करारका कर्मचारी रहेका छन् । अधिकांश स्वास्थ्यकर्मीहरू करारका रहेको उनले बताए । बिरामीको चापअनुसार स्वास्थ्यकर्मीको संख्या भने न्यून भएको बताए ।