विपद् जोखिम न्यूनीकरण र व्यवस्थापन प्राधिकरणलाई छुट्टै मन्त्रालय बनाउनुपर्छ : डा. तुलाधर

फाइल तस्बिर

काठमाडौँ- नेकपा (एकीकृत समाजवादी)का उपमहासचिव डा. गंगालाल तुलाधरले विपद् जोखिम न्यूनीकरण र व्यवस्थापन प्राधिकरणलाई मन्त्रालय बनाएर अघि बढ्नुपर्ने आवश्यकता रहेको बताएका छन् ।​ बिहीबार ललितपुरमा आयोजित राष्ट्रिय विपद् व्यवस्थापन प्राधिकरणले आयोजना गरेको कार्यक्रमलाई सम्बोधन गर्दै उनले यस्तो बताएका हुन् ।

उपमहासचिव तुलाधरले आफू सरकारमा सहभागी हुँदा विपद् जोखिम न्यूनीकरण र व्यवस्थापन प्राधिकरणलाई एउटा छुट्टै मन्त्रालय बनाएर जाने प्रयास गरे पनि सफल हुन नसकेको जिकिर गरे । उनले प्राधिकरणलाई गृह मन्त्रालय अन्तर्गत नभइ प्रधानमन्त्री कार्यालय अन्तर्गत राख्ने कुरा पनि सफल हुन नसकेको स्पष्ट पारे ।

उनले अब विपद्जन्य गतिविधिहरू बढ्ने भएकाले पूर्वतयारीका साथ काम गर्नुपर्ने आवश्यकता औंल्याए । सबैभन्दा पहिला शारीरिक अशक्तता भएकाहरूलाई सुरक्षित गर्नुपर्ने आवश्यकता रहेको र अन्य नागरिकलाई पनि पूर्व सूचनाको विस्तार गर्न आवश्यक रहेको उनले उल्लेख गरे ।

कार्यक्रममा राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलले विपद् जोखिम न्यूनीकरणका लागि बेलैमा पूर्व रणनीति बनाएर अघि बढ्न आवश्यक रहेको बताए । उनले विगतमा सिकेको अनुभवलाई रणनीति बनाएर अघि बढ्नसके विपदबाट जनधनको क्षति हुनबाट रोक्न सकिने उल्लेख गरे ।

उनले गीतसंगीत र भिडियोको माध्यमबाट गाउँ-गाउँमा सचेतना फैल्याउनुपर्ने बताए  । कार्यकारी प्रमुख पोखरेलले शारीरिक अशक्त भएकाहरूलाई सबैभन्दा पहिला विपद्जन्य अवस्थाका बारेमा सचेत र सूचना दिनुपर्ने बताए ।