करोड हेरिएका ६ गीत समेटेर दीपक शर्माले निकाले एल्मब 'करोड'

काठमाडौं - संगीतकार दीपक शर्माका ६ वटा फिल्मका गीत करोड क्लबमा पुगेको गीति एल्बम लोकार्पण गरिएको छ । काठमाडौं आइतबार आयोजित एक कार्यक्रममा गीतकार राजेन्द्र थापा, संगीतकार चेतन सापकोटा, नरहरि प्रेमी र चलचित्र पत्रकार संघका पूर्व अध्यक्ष शान्ति प्रियले संयुक्त रुपमा ‘करोड’ एल्बम लोकार्पण गरेका हुन् । 

करोड एल्बममा फिल्म मंगलमबाट ‘पर्ख पर्ख मायालु, छक्का पञ्जा ३’बाट ‘पहिलो नम्बरमा’, फिल्म हिजोआजका कुराबाट ‘माया जदौ’, फिल्म ‘छक्का पञ्जा ३’बाटै ‘देखन चम्पा’ केही महिनाअघि रिलिज भएको फिल्म ‘छक्का पञ्जा ४’को ‘दर्शन सलाम’ र फिल्म ‘चि मुसी चि’को हवल्दार सुन्तली’ गीत करोडभन्दा बढी पटक युट्युबमा हेरिएको छ । करोड क्लबमा पुगेका गीतहरु संकलन गरेर संगीतकार शर्माले ‘करोड’ नामक एल्बम विमोचन गरेका हुन् ।

गीति एल्बमको बिमोचन गर्दै संगीतकार तथा गायक नरहरि प्रेमीले दीपकले  संगीतमा नयाँ आयाम थपेको बताए । दीपकका गुरुसमेत रहेका नरहरिले दीपकलाई आफूले संगीतको बाटो देखाउन प्रेरित गरेको स्मरण गराए । गायनको सुरुवातमा दीपकलाई धेरै संगीतकारहरुले रिजेक्ट गरेको अनुभव सुनाउँदै उनले दीपकका गीत करोड क्लबमा पुगेकोमा खुसी व्यक्त गरे । 

‘दीपकले पहिलो पटक ‘मोबाइलको बोक्रो र खोक्रो’ बोलको गीतबाट गायनमा अगाडि बढेका हुन् । त्यो बेला मैले नै उसलाई यो गीत गाउन लगाएको थिएँ,’ उनले उदितनारायण झाको कथा सम्झँदै भने, ‘उदितनारायण झालाई कतिपय संगीतकारले यसले के गीत गाउँछ यसले भनेर रिजेक्ट गरिएका थिए रे । तर, पछि नामी गायक भएर जन्मिए ।’  

संगीतकार संघका अध्यक्ष चेतन सापकोटाले संगीतकार शर्माको मेहनतको प्रशंसा गरे । ‘गाउँमा कुटो कोदालो छाडेर हार्मोनियम बोकेर आएका हौँ, यो बाटो दीपकले पनि समाएको छ,’ उनले भने, ‘करोड पटक गीत हेरिएकोमा बधाई छ। उनले गीतसंगीतका व्यापारीहरुले संगीतकार र गीतकारको रोयल्टी नदिई आफै मोटाउने गरेको आरोप लगाए । 

वरिष्ठ गीतकार राजेन्द्र थापाले गीतहरु करोड क्लबमा पुग्नु चानचुने कुरा नरहेको बताए । गीतकार थापाकै शब्द रचनामा रहेको फिल्म ‘छक्का पञ्जा ३’को गीत ‘पहिलो नम्बरमा ’ र फिल्म ‘छक्का पञ्जा ४’मा समावेश गीत ‘दर्शन सलाम’ लगायत गीतहरु चलेकोमा खुसी व्यक्त गरे । 

उनले भने, ‘एउटा चल्नु दुईटा चल्नु ठिकै हो । तर, ६/६ वटा करोड पुग्नु चानचुने कुरा होइन ।’ उनले संगीतकार दीपक शर्मालाई भर्सटायल संगीतकारका रुपमा हेरेको समेत बताए ।