कांग्रेस, माओवादी र जसपा यादवसमूहको गठबन्धन यथावत

काठमाडौँ : वैकल्पिक सरकार बनाउन नसकेपछि कांग्रेस, माओवादी र जनता समाजवादी पार्टी (जसपा)का उपेन्द यादव खेमाले आफ्नो कमजोरी बारे समिक्षा गर्दै सहकार्य जारी राख्‍ने भएका छन् । कांग्रेस सभापति शेरबहादुर देउवा निवासमा भएको छलफलमा माधवकुमार नेपाल र महन्थ ठाकुरले धोका दिएको निश्कर्ष निकालेका हुन् ।

उनीहरूले यहाँको आन्तरिक कारण नभै अन्य बलका कारण धोका दिएको पनि उनीहरुको समिक्षा छ । यद्यपि त्यसको पुष्टि गर्न नसकिएको छलफलमा सहभागि एक नेताले बताए । बुढानीलकण्ठमा सभापति देउवा, माओवादी अध्यक्ष पुष्पकमल दाहाल र जसपा अध्यक्ष उपेन्द्र यादवसहितले  यस्तो  निष्कर्ष निकालेका हुन् ।

देउवालाई प्रधानमन्त्री बनाउने गरी भएको पहलमा कहाँ कमजोरी भएको भन्‍ने विषयमा पनि छलफल भएको बताइएकाे छ । यता शपथको तयारी भइरहँदा बुढानीलकण्ठमा उनीहरूको समिक्षात्मक बैठक भएको हो । बैठकमा विदेशी शक्तिको चाहना नै ओलीको निरन्तरता रहेको छताछुल्ल भएको पनि भनिएको छ । त्यसमा धेरै समिक्षा गर्न नपर्ने धारणा आएको पनि बताएका छन् । 

वर्तमान सरकार निर्माणमा विदेशी शक्तिको विशेष भूमिका रहेको भन्दै त्यसमा गम्भीर हुनु पर्ने धारणा बारेमा छलफल भएको थियो । आगामी कदमहरूलाई नजिकबाट नियाल्न पर्ने धारणा पनि छलफल भएको थियो । कांग्रेस, माओवादी र जसपाको यादव खेमाको संवाद र सहकार्य यथावत रहने पनि जनाए ।