आजदेखि दोस्रो चरणको भेरोसेल खोप लगाउन सुरु

काठमाडौँ : दोस्रो चरण अन्तर्गतको कोभिड विरुद्धको चिनियाँ भेरोसेल खोप आजदेखि लगाउन सुरु गरिएको छ । काठमाडौँ उपत्यका सहित काभ्रे, सिन्धुपाल्चोक, नुवाकोट र रसुवामा दोस्रो मात्राको खोप कार्यक्रम अभियान सुरु भएको हो ।

गत चैत २५ देखि वैशाख १५ गतेसम्म पहिलो मात्रा लगाएकाहरुलाई आजदेखि ११ गतेसम्म दोस्रो मात्राको खोप लगाउन थालिएको हो । पहिलो मात्रा लिएकाले आफूलाई पायक पर्ने ठाउँमा गएर दोस्रो मात्राको खोप लिन सक्नेछन् ।

काठमाडौँ महानगरले एक वडा एक खोप केन्द्र तोकेको छ । खोप केन्द्रमा कम्तीमा दुईजना खोपकर्ता र एकजना खोपकर्ता बराबर ३ जना स्वयंसेवक परिचालन हुनेछन् ।

स्वास्थ्य तथा जनसंख्या मन्त्रालयको वैशाख २२ गतेको र जिल्ला विपद् व्यवस्थापन केन्द्रको वैशाख २५ गतेको निर्णयअनुसार गत चैत २५ गतेदेखि वैशाख १५ गतेसम्म पहिलो मात्रा लगाएकालाई दोस्रो मात्रा दिन लागिएको छ । यसमा १८ वर्षदेखि ५९ वर्ष उमेर समूहका नागरिक छन् ।

दोस्रो खोप लगाउन पहिलो खोप लिएको मितिका आधारमा तय गरिएको छ । जसअनुसार २०७७ चैत २५, २६, २७ र २८ गते पहिलो मात्रा लगाएकालाई जेठ २ गते दोस्रो खोप दिइनेछ ।

यसैगरी चैत २९ र ३० गते पहिलो खोप लिएकालाई जेठ ३ गते, २०७७ चैत ३१ र २०७८ वैशाख २ गते पहिलो खोप लगाएकालाई जेठ ४ गते दोस्रो मात्राको खोप दिइनेछ ।

वैशाख ३ र ४ गते पहिलो खोप लगाएकालाई जेठ ५ गते, वैशाख ५ र ६ गते पहिलो खोप लगाएकालाई जेठ ६ गते, वैशाख ७, ८, ९ र १० गते पहिलो खोप लगाएकालाई जेठ ७ गते, वैशाख ११ र १२ गते पहिलो खोप लिएकालाई जेठ ८ गते भेरोसेलको दोस्रो मात्रा खोप दिइनेछ।

वैशाख १३, १४ र १५ गते पहिलो मात्रा लिएकाहरुलाई क्रमशः जेठको ९, १० र ११ गते दोस्रो खोप दिइनेछ ।