नुवाकाेटमा तीन कोभिड सङ्क्रमितको मृत्यु

नुवाकाेट : नुवाकोटमा आज कोभिड सङ्क्रमित तीन जनाको मृत्यु भएको छ । कोभिड सङ्क्रमित भएर त्रिशुली अस्पतालमा उपचार गराउँदै आएका दुई र होम आइसोलेशनमा रहेका एकजनाको मृत्यु भएको हो ।

अस्पतालको सघन उपचार कक्षमा उपचाररत विदुर नपा–४ की ४३ वर्षीया महिला र अस्पतालको आइसोलेशन वार्डमा उपचाररत किस्पाङ गापा–५ का ३३ वर्षीय एक पुरुषको मृत्यु भएको अस्पतालका प्रमुख डा दीपेन्द्र पाण्डेले जानकारी दिए । उनका अनुसार, कोभिड सङ्क्रमित भएर उपचाररत दुवै जनाको आज बिहान मृत्यु भएको हो । यस्तै शिवपुरी गापा–४ सिक्रेमा कोभिड सङ्क्रमित ६१ वर्षीया एक महिलाको आज बिहान मृत्यु भएको छ ।

आफ्नै घरमै आइसोलेशनमा बस्दै आएकी ६१ वर्षीया महिलाको श्वासप्रश्वासमा समस्या देखिएसँगै आज बिहान मृत्यु भएको सोही वडाका वडाध्यक्ष झमकराज गुरुङले जानकारी दिए । नुवाकोटभित्र कोभिड सङ्क्रमणका कारण मृत्यु हुनेको सङ्ख्या योसहित आठ पुगेको छ । कोरोनाका सक्रिय सङ्क्रमितको सङ्ख्या हाल ७३७ रहेको छ । रासस