सांसद विकास कोषको बचाउ गर्दै अर्थमन्त्रीले भने : बजेट सांसदको खल्तीमा जाने होइन

काठमाडौँ– अर्थमन्त्री प्रकाशशरण महतले दुई वर्षपछि ब्यूँतिएको सांसद विकास कोषको बचाउ गरेका छन् । सोमबार संसदमा बजेटमाथि उठेका प्रश्नको जवाफ दिँदै उनले यो कार्यक्रम अन्तर्गतको बजेट सांसदको खल्तीमा नजाने बताए । 

महतले बजेटमाथि जसरी हुन्छ खोट देखाउन नेकपा एमालेलगायत प्रतिपक्षीले निर्वाचन क्षेत्र विकास कार्यक्रमको बजेट सांसदको खल्तीमा जाने गरी विनियोजन भयो भनेर प्रचार गरिएको गुनासो गरे । बजेटमाथि आलोचना गर्नु विपक्षीहरूको कर्तव्य नै भएको उनले कटाक्ष गरे । 

सांसदहरूको सिफारिसमा विभिन्न पाँच वटा योजनामा रकम खर्च गर्ने र त्यसको ठेक्का सम्बन्धित मन्त्रालयहरूले गर्ने बताउँदै उनले भने, ‘यो रकम माननीयहरूको खल्तीमा जाने होइन । माननीयज्यूहरूले सिफारिस पनि गर्न नहुने जायज छैन । जनताको अपेक्षा धेरै छ, सांसदहरूलाई नीति निर्माताका रूपमा मात्र जनताले बुझेका छैनन्, सुखदुःखमा सम्बोधन गरिदिओस् । त्यसकारण सिफारिस जायज छ ।’

महतले संसदमा बजेटको छलफलका क्रममा उठेका प्रश्नको जवाफ दिइरहेका छन् । बजेटमाथिको छलफल हिजो (आइतबार) सकिएको छ ।