बागमती सरकारले बजेट बढाएर ल्याउने

फाइल तस्‍बिर

हेटौंडाः चालू आर्थिक वर्षमा ५१ अर्बको बजेट ल्याएको प्रदेश सरकारले आगामी आर्थिक वर्ष २०७८/७९ मा बजेट बढाएर ल्याउने तयारी गरेको छ । कोभिडको दोस्रो लहर बढेकोले स्वास्थ्य क्षेत्रमा बढी बजेट खर्चनुपर्ने तथा बहुवर्षीय योजनाहरूलाई पूरा गर्नुपर्ने हुँदा बजेट बढ्न सक्ने आर्थिक मामिला तथा योजना मन्त्री कैलाश ढुङ्गेलले जानकारी दिए । 

उनले सबै मन्त्रालयलाई बजेट सिलिङ पठाइसकेको भन्दै ठयाक्कै बजेट कति आउँछ भनेर भन्न नसक्ने बताए । बागमती प्रदेश सरकारले वर्षैपिच्छे बजेटको आकार बढाउँदै लगेको छ । आव ७४/७५ मा १ अर्बको बजेट ल्याएको प्रदेशले क्रमश आव ७५/७६ मा ३४ अर्ब, आव ७६/७७ मा ४७ अर्ब हुँदै आव ७७/७८ मा ५१ अर्बको बजेट पास गरेको थियो । 

आगामी वर्षको नीति तथा योजना र बजेट निर्माणमा सबै मन्त्रालय लागिसकेका छन् । पूर्वबजेटसम्बन्धी छलफल भएर मात्रै बजेट सिलिङ मन्त्रालयलाई पठाइएको आर्थिक मामिला मन्त्रालयकी उपसचिव बिमला घिमिरेले बताइन् । उनले मन्त्रालयले चालू वर्षमा गरेको खर्चलाई आधार मानेर सिलिङ पठाएको जानकारी दिइन् । नीति योजना तथा बजेट यर्थापरक बनाउन प्रदेशको मुख्यमन्त्री डोरमणि पौडेलले नीति तथा कार्यक्रम र बजेट सम्बन्धी छलफलमा सबै मन्त्रालयका सचिवहरुलाई निर्देशन दिएका छन्  । 

बागमती प्रदेशमा सबैभन्दा धेरै भौतिक पूर्वाधार विकास मन्त्रालयको लागि बजेट छुट्टिने गरेको छ । कूल बजेटको करिब ३५ प्रतिशत बजेट भौतिक मन्त्रालयलाई छुट्टाइन्छ । सडकपुल, खानेपानी, भौतिक संरचना लगायतको क्षेत्रमा धेरै खर्च हुने हुँदा आगामी वर्षमा पनि भौतिक मन्त्रालयको बजेट सबैभन्दा बढी हुने देखिएको छ । 

भौतिक विकास मन्त्री रामेश्वर फुँयालले गएको चैत्रबाटै आगामी बजेटको लागि आन्तरिक तयारी थालिएको जानकारी गराए । उनले मातहतको सबै कार्यालयहरूको योजना पेश भएको अन्तिम चरणमा पुगेको बताए । यस्तै आगामी वर्षमा स्वास्थ्य र शिक्षालाई प्राथमिकता राखेर बजेट तयार पारिने सामाजिक विकास मन्त्री सरस्वती बस्नेतले बताइन् । 

उनले कोभिडविरुद्ध लड्न स्वास्थ्य पूर्वाधारको लागि पर्याप्त बजेट विनियोजन हुने जानकारी दिइन् । यता कोभिडले उद्योग, पर्यटन व्यवसायलाई राहत हुनेगरी बजेट ल्याउने तयारी उद्योग तथा पर्यटन मन्त्रालय लागिपरेको छ । आउँदो असार १ गते प्रदेश सरकारले बजेट सार्वजनिक गर्ने भएपनि नीति तथा कार्यक्रम सार्वजनिक हुने मिति टुंगो लागेको छैन । बजेट ल्याउनुपूर्व नै नीति तथा कार्यक्रम घोषणा गर्ने आर्थिक मामिला मन्त्री ढुंगेलले जानकारी दिए ।