एमाले र राप्रपाले बहिष्कार गरेपछि बागमती प्रदेशसभा बैठक बुधबारका लागि बाेलाइयाे

मकवानपुर- प्रमुख प्रतिपक्ष दल एमाले र राप्रपाले बैठक अवरुद्ध गर्ने चेतावनी दिएपछि बागमती प्रदेशसभा बैठक बुधबार पनि स्थगित भएको छ । बुधबार दिउँसो साढे १ बजेका लागि बोलाइएको बैठक झण्डै ४ घण्टापछि साँझ सवा ५ बजे सुरु भएकाे थियाे ।  

प्रमुख प्रतिपक्ष दल एमाले र प्रतिपक्ष दल राष्ट्रिय प्रजातन्त्र पार्टी (राप्रपा) ले अवरुद्ध गर्ने तयारी गरेपछि प्रदेश सभाको बैठक असार १७ गते आइतबारसम्मका लागि स्थगित गरिएको छ । सभामुख भुवनकुमार पाठकले असार १७ गते अपराह्न २ बजे बस्ने गरी बुधबारकाे बैठक स्थगित गरेका हुन् । मंगलबारकाे बैठक पनि प्रमुख प्रतिपक्ष दल नेकपा एमाले र राप्रपाले बहिष्कार गरेपछि बुधबारका लागि बाेलाइएकाे थियाे ।

बुधबारकाे बैठक प्रारम्भ हुनासाथ राप्रपा संसदीय दलका नेता उद्धब थापाले आफ्नो धारणा राख्नासाथ बैठक अवरुद्ध भएको हो । थापाले बोल्नासाथ प्रतिपक्ष दलका सांसदहरूले सरकारले बजेट पुनर्लेखन नगरिकन संसद चल्न नदिने अडान राखेपछि बैठक १७ गतेसम्मको लागि स्थगित भएको हो ।

बागमती प्रदेश सरकारले ल्याएको आगामी आर्थिक वर्षको बजेट लक्ष्यविहीन एवम् जनताप्रति विभेदकारी भएको, आफ्नो निर्वाचन क्षेत्र र चुनावीमूलक रहेको भन्दै प्रमुख प्रतिपक्ष दल नेकपा एमाले, राप्रपा र नेमकिपाका सांसदहरूले पटक–पटक संसद अवरोध गर्दै आएको छ ।

विनियोजित बजेट २०८०/०८१ को सम्बन्धमा सत्तापक्ष र प्रतिपक्ष बीच बैठक संचालन गर्ने सम्बन्धमा विभिन्न चरणमा छलफल भए पनि सहमति हुन नसकेपछि बैठक स्थगित गरिएकाे प्रदेश सभा सचिवालयले जनाएकाे छ । प्रदेश सरकारले ल्याएको बजेट एक पक्षीय भएको, सरकारको मन्त्री रहेको जिल्ला र क्षेत्रलाई मात्र प्राथमिकता दिएको भन्दै एमाले र राप्रपाले विरोध गर्दै आएका छन् ।