नुवाकोटमा निषेधाज्ञा १५ दिन थप, तीनको मृत्यु

फाइल तस्बिर

नुवाकोट : कोभिड-१९ संक्रमणको जोखिम नियन्त्रणका लागि नुवाकोटमा लगाइएको निषेधाज्ञा आजदेखि पुनः १५ दिन थप गरिएको छ । गत वैशाख २१ देखि शुरु भएको निषेधाज्ञा दोस्रो पटक थप गरेर यही जेठ १८ गते राति १२ बजेसम्म कायम रहने प्रमुख जिल्ला अधिकारी जीवनप्रसाद दुलालले जानकारी दिए । 
 
कोभिड संक्रमित भएर उपचाररत थप तीनको त्रिशूली अस्पतालमा मृत्यु भएको छ ।  अस्पतालमा उपचाररत सूर्यगढी गाउँपालिका-३ की ३१ वर्षीया र  किस्पाङ गाउँपालिका-५ की ४२ वर्षीया महिलाको उपचारका क्रममा आज निधन भएको अस्पतालका मेडिकल सुपरिटेन्डेन्ट डा दीपेन्द्र पाण्डेले जानकारी दिए । उनका अनुसार उनीहरू दुवैलाई अस्पतालको सघन उपचार कक्ष र भेन्टिलेटरमा राखेर उपचार गरिएको थियो ।
 
यस्तै धादिङ, नीलकण्ठ नगरपालिका-११ का ५५ वर्षीय एक पुरुषको पनि उपचारका क्रममा गए राति निधन भएको छ । निधन भएका नुवाकोटका दुई जना आज थप भएसँगै जिल्लाभित्र कोरोनाका कारण ज्यान गुमाउने  १२ र  सक्रिय संक्रमित ८२१ जना छन् । (रासस)