बालाजी र लक्ष्मीपति सुन पसल अवैध सुन कारोबारमा तानिए

बुटवल- केहि दिन अघि रुपन्देहीको सिमानाकाबाट भारततर्फ लैजाँदै गरेको अवस्थामा सशस्त्र प्रहरीले बरामद गरेको झण्डै २ किलो सुनको अनुसन्धान बुटवलका सुन व्यवसायी तानिएका छन् । भैरहवा भन्सार कार्यालयले सुरु गरेको प्रारम्भिक अनुसन्धानमा बुटवलको अमरपथस्थित बालाजी सुनचाँदी पसल र लक्ष्मीपती सुनचाँदी पसलको संलग्नता देखिएको हो।

अनुसन्धानका क्रममा सुनसहित पक्राउ परेका दाङको घोराही उपमहानगरपालिका-१० का हुमानन्द गिरीलाई जिल्ला अदालतबाट म्याद थप गरि अनुसन्धान सुरु गरिएको भैरहवा भन्सार कार्यालयका सूचना अधिकृत युवराज भट्टराईले जानकारी दिए । गिरीको बयानका आधारमा बुटवलको बालाजी सुनचाँदी पसल र लक्ष्मीपती सुनचाँदी पसल मा सिल गरेर अनुसन्धान अगाडि बढाईएको छ । 

शसस्त्र प्रहरी बल, सीमा सुरक्षा कार्यालयले असार १० गते १ केजी ९६५ दशमलव ३ ग्राम तौल कायम भएको सुन भैरहवा भन्सार कार्यालयमा बुझाएको थियो । करिब २ करोड मुल्यको बरामद प्रकरणमा जिल्ला अदालतमा मुद्दा चलाउनुपर्ने प्रावधान अनुसार अदालतबाट म्याद लिएर अनुसन्धान सुरु गरिएको उनले बताए ।

रुपन्देहीको नेपाल भारत सीमानामा पर्ने लुम्बिनी साँस्कृतिक नगरपालिका १३ कालिदहबाट शसस्त्र प्रहरीको चेकजाँचका क्रममा सुन बरामद भएको थियो । सीमानाका पार गर्न बा १२ च ३८२० नम्बरको मारुती सुजुकी कार र कार चालक दाङका हुमानन्द गिरीलाई शसस्त्रले भैरहवा भन्सारमा बुझाएको थियो ।