संविधान र कानुनको प्रतिकूल हुने गरी विज्ञापन गर्न पाइँदैन : मन्त्री शर्मा

काठमाडौँ- सञ्चार तथा सूचना प्रविधि मन्त्री रेखा शर्माले संविधान र कानुनको प्रतिकूल हुने गरी कुनै पनि कुराको विज्ञापन गर्न नपाइने बताएकी छिन् ।​ बिहीबार राष्ट्रिय विज्ञापन नीतिको मस्यौदा सम्बन्धमा सरोकारवालासँगको छलफल कार्यक्रममा बोल्दै मन्त्री शर्माले संविधान र कानुनले गरेको व्यवस्थाको प्रतिकूल हुने गरी विज्ञापन गर्न नपाइने बताएकी हुन् ।

उनले पछिल्लो समय डिजिटल माध्यममा औषधिको समेत विज्ञापन गर्ने गरिएको भन्दै यसले मानव स्वास्थ्यमा समस्या नै देखापरेको जिकिर गरिन् । उनले के–के कुराको विज्ञापन गर्न पाइने र के–के कुराको विज्ञापन गर्न नपाइने हो भन्ने कुरामा कडाइ हुनुपर्ने बताइन् । यद्यपि यस सम्बन्धमा कानुनी व्यवस्था भए पनि कानुनी दायरा र सजायको पाटो भने कमजोर भएको उनको भनाइ छ ।

उनले अनलाइन सपिङ गर्न पाउने कि नपाउने भन्ने विषयमा समेत आफूहरूले छलफल गरिरहेको भन्दै यस सम्बन्धमा पनि कानुन बनाइने बताइन् ।