संसद् खुलाउने विषयमा ओलीले भने : पार्लियामेन्टमा थाहा हुन्छ

काठमाडौँ– संसद् अवरोध हटाउने विषयमा तीन नेताबीचको छलफल सकिएको छ । सिंहदरबारमा प्रधानमन्त्री पुष्पकमल दाहाल 'प्रचण्ड', नेपाली कांग्रेस सभापति शेरबहादुर देउवा र प्रमुख प्रतिपक्षी दल नेकपा एमाले अध्यक्ष केपी शर्मा ओलीबीच बसेको बैठक सकिएको हो । 

बैठकको निष्कर्षबारे पत्रकारहरूले गरेको प्रश्नमा ओलीले ‘पार्लियामेन्टमा थाहा हुन्छ’ भन्दै प्रतिक्रिया दिएका छन् । 

संसद् खुलाउने विषयमा आइतबार पनि प्रधानमन्त्रीसहित तीन शीर्ष नेताले छलफल गरेका थिए । बैठकबाट सहमति पनि जुटेको थियो । तर, पछि प्रधानमन्त्रीको सचिवालयले गत असार २१ गते निकालेको प्रेस विज्ञप्तिप्रति ओलीले आपत्ति जनाएपछि सहमति भंग भएको थियो ।

गत सोमबार प्रधानमन्त्री प्रचण्डले सरदार प्रितम सिंहको पुस्तक विमोचन कार्यक्रममा सिंह आफूलाई प्रधानमन्त्री बनाउन पटक–पटक दिल्ली गएको भनी अभिव्यक्ति दिएका थिए । त्यसलाई लिएर एमालेले प्रतिनिधिसभा र राष्ट्रियसभा दुवै सदन अवरुद्ध पारेको छ । 

एमालेले प्रधानमन्त्रीले राजीनामा नदिएसम्म संसद् चल्न नदिने बताउँदै निरन्तर अवरोध गर्दै आएको छ ।

आज प्रतिनिधिसभाको बैठक दिउँसो ३ बजेलाई बोलाइएको छ ।