खुल्यो मेची राजमार्ग, हेवा खोलाको बेलिब्रिज सञ्चालनमा

विराटनगर- पाँचथर र ताप्लेजुङ जोड्ने हेवा खोलाको पक्की पुल बगाएपछि अवरुद्ध भएको मेची राजमार्ग आइतबार अपराह्नबाट खुलेको छ । बेलिब्रिज जडान कार्य सम्पन्न भएपछि पाँचथरबाट ताप्लेजुङ जोड्ने सडक सञ्चालनमा आएको जिल्ला प्रहरी कार्यालय पाँचथरले जनाएको छ ।

असार ३ गतेको बाढीले हेवा खोलाको मोटरेबल पुल बगाउँदा मेची राजमार्ग अन्तरगत पाँचथर–ताप्लेजुङबीच यातायात सम्पर्क टुटेको थियो । पुल बगाउँदा सर्वसाधारणको आवतजावतका लागि भनेर तुइन र बाँसको फड्के पुल बनाएर सञ्चालन गरिएको थियो । तर, सवारी साधन सञ्चालनका लागि बनाइएको डाइभर्सन पनि त्यसपछिको बाढीले पटक–पटक बगाउँदा समस्या भएको थियो ।

प्रहरीले आइतबारबाट हेवाखोलास्थित मेची राजमार्गमा एकतर्फी रूपमा सवारी साधन सञ्चालन हुने गरी बेलिब्रिज निर्माण सम्पन्न भई सञ्चालनमा आएको जनाएको छ ।

बेलिब्रिज पहिलो पटक सञ्चालनमा आएका कारण आइतबारका लागि साना सवारी साधनमात्रै सञ्चालनको व्यवस्था गरिएको र त्यसपछि क्रमशः ठूला सवारी साधन सञ्चालन गरिने व्यवस्था मिलाएको प्रहरीको भनाइ छ ।

हेवा खोलाको बाढीले पक्की पुल बगाएपछि वैकल्पिक व्यवस्थाका लागि सोही स्थानमा ४८ दशमलव ८० मिटर लामो बेलिब्रिज जडान गरिएको हो । उक्त बेलिब्रिजको एक पटकमा २५ टनसम्म मात्रै भार बहन क्षमता रहेको जनाइएको छ ।

पुल सञ्चालनमा आए पनि तोकिएको भारवहन क्षमताभन्दा बढी यातायातका साधन सञ्चालन नगर्न स्थानीय प्रशासनले यातायात व्यवसायीहरूलाई आग्रह गरेको छ ।