काठमाडौँ महानगरले सामुदायिक विद्यालयका शिक्षकलाई मासिक तलब उपलब्ध गराउने

काठमाडौँ- काठमाडौँ महानगरपालिकाले आफ्नो मातहत भित्रका सामुदायिक विद्यालयका शिक्षकहरूलाई मासिक रूपमै तलब उपलब्ध गराउने व्यवस्था गरेको छ । महानगरपालिकाकी उपमेयर सुनिता डंगोलले स्रोत भर्ना कोषमार्फत आफूहरूले सामुदायिक विद्यालयका शिक्षकहरूलाई मासिक रूपमा नै तलब खुवाउने व्यवस्था गरेको बताइन् ।

सामुदायिक विद्यालयका शिक्षकहरूले त्रैमासिक रूपमा तलब पाउने व्यवस्था संघीय सरकारले गरेको छ । तर, काठमाडौँ महानगरपालिकाले भने स्रोत भर्ना कोषमार्फत उनीहरूलाई मासिक रूपमै तलब लिने व्यवस्था गरेको हो ।

उपमेयर डंगोलले भनिन्, 'यो वर्ष भित्रबाट काठमाडौँ महानगरपालिका भित्रका सामुदायिक विद्यालयका शिक्षकहरूले पनि मासिक रूपमै तलब पाउने व्यवस्था हामीले गरेका छौं । यो चाही त्रैमासिक रूपमा केन्द्रीय सरकारबाट आउने बजेट यस पटकदेखि भने हामीले स्रोत भर्ना कोष राखेका छौं । यो मार्फतबाट चाही हरेक महिना महानगरपालिका भित्रका सामुदायिक विद्यालयका शिक्षकहरूले भने तलब मासिक रूपमा नै पाउने व्यवस्था हामीले गरेका छौं ।’