सिटीका फरवार्ड माहरेज साउदी क्लब अल-अहलीमा अनुबन्ध

काठमाडौँ- म्यानचेस्टर सिटीका फरवार्ड रियाद माहरेज साउदी अरबियन फुटबल क्लब अल-अहलीमा अनुबन्ध हुने भएका छन् । सिटी र अल-अहलीबीच ३० मिलियन पाउण्डको सम्झौता भएको बीबीसीले जनाएको छ ।

३२ वर्षीय माहरेजलाई सिटीको प्रि-सिजन जापान र दक्षिण कोरियाको यात्रामा नजान अनुमति दिइएको थियो ।

माहरेजले सिटीका लागि पाँच सिजनमा दुई सयभन्दा बढी खेल खेल्दै चार पटक प्रिमियर लिगको उपाधि जितेका थिए । सिटीले २०१८ मा माहरेजलाई लिसेस्टर सिटीबाट ६० मिलियन पाउण्डमा क्लबमा भित्र्याएको थियो ।

सिटीले गत सिजन ट्रेबल जित्दा माहरेजले ४७ खेलमा १५ गोल गरे ।

कप्तान इल्के गुन्डोगान बार्सिलोना गएसँगै सिटी छाड्ने माहरेज दोस्रो हाई प्रोफाइल खेलाडी हुन् ।