अफगानिस्तानमा पाकिस्तानी प्रधानमन्त्रीको विरोध

अफगानिस्तानमा पाकिस्तानका प्रधानमन्त्री इमरान खानको विरुध्दमा विरोध प्रदर्शन भएका छन् । पाकिस्तानका प्रधानमन्त्री इमरान खान अफगानिस्तानको भ्रमणमा गएको बेलामा उनको विरुध्दमा अफगानिस्तानका केही ठाउँमा विरोध भएको हो । 

पाकिस्तानले आतंकवादीहरुलाई बस्‍न दिएको र सहयोग गरेको भन्दै उनको विरुध्दमा प्रदर्शन गरिएको अन्तर्राष्ट्रीय सञ्‍चारमाध्यमहरूले जनाएका छन् । हालैमात्र एक अन्तर्राष्ट्रिय प्रतिवेदनमा पाकिस्तानमा आतंकवादीहरूको बसोबास रहेको समाचार सार्वजनिक भएको थियो । 

यसै विषयलाई लिएर अफगानिस्तानका केही स्थानमा पाकिस्तानले आतंकवादीलाई बस्‍न दिन नहुने भन्दै प्रधानमन्त्री खानको विरुध्द प्रदर्शन गरिएको हो ।

प्रधानमन्त्री खान अफगानिस्तानका राष्ट्रपति असरफ घानीको आमन्त्रणमा अफगानिस्तान भ्रमणका लागि बिहीबार काबुल पुगेका छन् । खान प्रधानमन्त्री भएपछि उनको यो पहिलो पटक अफगानिस्तान भ्रमण हो । 

उनले अफगानिस्तानमा रहँदा हाल अफगानिस्तान सरकार र त्यहाँका तालिबानहरूले थालेको शान्ति वार्ताको विषयमा कुराकानी गर्नेछन् । हाल अफगानिस्तानको सरकार र यहाँ सशस्त्र हिंसा गरिरहेका तालिबानहरूका बीचमा शान्ति वार्ता शुरु भएको छ । गएको दुई महिना अघिदेखि नै कतारको दोहामा शुरु भएको भनिएको  वार्तामा भएको प्रगतिको बारेमा भने केही बताइएको छैन ।(रासस)